वनकर्मीले मन्त्रीलाई दिए ऐन जलाउनेदेखि मन्त्रालय घेर्नेसम्मको चेतावनी (तस्विरहरु)

८ माघ, हेटौंडा । बागमती प्रदेशका सामुदायिक वनकर्मीहरुले प्रदेशका मन्त्रीलाई भेटेर ऐन जलाउनेदेखि मन्त्रालय घेर्नेसम्मको चेतावनी दिएका छन् ।
सामुदायिक वन उपभोक्ता महासंघ नेपाल (फेकोफन) बागमती प्रदेशले बुधबार बागमती प्रदेशका उद्योग, पर्यटन, वन तथा वातावरण मन्त्री अरुण नेपाललाई ज्ञापनपत्र बुझाउँदै ऐन जलाउनेदेखि मन्त्रालय घेर्नेसम्मको चेतावनी दिएका छन् । प्रदेश अध्यक्ष विनोद सापकोटाको नेतृत्वमा गएको सामुदायिक उपभोक्ता समुहका प्रतिनिधिहरुले मन्त्रीको पुत्ला जलाउनेसम्मको चेतावनी दिएका छन् । 
ऐन संशोधन नभए माघ १५ गतेसम्म जिल्लास्तरीय सामुदायिक वनको भेला गरी पर्चा वितरण गर्ने, माघ १७ गते प्रदेश वन ऐन जलाउने र वन मन्त्रालयद्वारा संचालित सम्पूर्ण गतिविधि बहिस्कार गरी काठ दाउरा लगायतका वन पैदावारको कटान, मुछान एवं निकासी बन्द गर्ने, माघ २० गते डिभिजन वन कार्यालयमा तालाबन्दी गरी एक घण्टा धर्ना दिने र माघ २५ गतेदेखि प्रदेश वन मन्त्रालय  अनिश्चितकालिन घेराउ गर्ने र वन ऐन जारी गर्न मूख्य भुमिका खेल्ने व्यक्तिहरुको पुत्ला जलाउने कार्यक्रम तय भएको ज्ञापनपत्रमा उल्लेख छ । 
ज्ञापनपत्र बुझाउने कार्यक्रममा प्रदेश अध्यक्ष सापकोटा, सिन्धुली अध्यक्ष कृष्णबहादुर श्रेष्ठ, मकवानुर अध्यक्ष साधुराम चौलागाई, प्रदेश सदस्य रामहरी चौलागाई, महासंघ स्थानीय महासंघ हेटौंडाका अध्यक्ष शम्भुप्रसाद न्यौपाने लगायतका विभिन्न सामुदायिक वन समूहका अध्यक्ष, प्रतिनिधि, उपभोक्ता एवं सरोकारवालाहरुको सहभागिता रहेको थियो । मन्त्री नेपालले भने आन्दोलन भन्दा छलफलबाट समस्या समाधानका लागि आग्रह गरेका थिए ।