मकवानपुरगढी दरबारमा २५७ औं विजय उत्सव सम्पन्न

१० माघ, हेटौंडा । मकवानपुरमा रहेको पर्यटकीय एवं ऐतिहासिक किल्ला मकवानपुरगढी दरबारमा शुक्रबार २५७ औं विजय उत्सव मनाईएको छ । विक्रम सम्बत १८१९ माघ १० गते बंगालका नबाव मीर कासिमको फौजलाई पृथ्वीनारायण शाहको फौजले पराजित गरेको सम्झनामा विजय उत्सव मनाईएको हो ।
विदेशी सेनाविरुद्ध प्राप्त पहिलो विजयकै कारण नेपाल एकिकरणको अभियान अघि बढेकाले केही बर्षदेखि मकवानपुरगढीमा विजय उत्सव मनाउन थालिएको छ । विजय उत्सव कार्यक्रममा बागमती प्रदेशका मूख्यमन्त्री डोरमणी पौडेलले देश अहिले आर्थिक समृद्धिको अभियानमा अघि बढेको भन्दै सबैले उत्पादनमा जोडिनुपर्ने सुझाव दिए । उनले कृषि र पर्यटनलाई संगै जोडे मात्रै समृद्धि सम्भव हुने भएकाले मकवानपुरजस्तो ऐतिहासिक क्षेत्रमा पर्यटन प्रवद्धन गरी लाभ हासिल गर्नुपर्ने बताए ।
मूख्यमन्त्री पौडेलले ५१ फिटको राष्ट्रिय झण्डा झण्डोतोलन गरेका थिए भने एकदन्ते सेतो हात्तिको मूर्ति अनावरण गरेका थिए । कार्यक्रममा परराष्ट्रविद्ध हिरण्यलाल श्रेष्ठ, संघीय संसद अन्तरगतको अर्थ समितिका सभापति कृष्णप्रसाद दाहाल, प्रदेश सांसद प्रेमबहादुर पुलामी, मकवानपुरगढी गाउँपालिकाका अध्यक्ष बिदुर हुमागाईल र २ नम्बर वडा अध्यक्ष बखानसिं पाख्रिनले मकवानपुरगढीको ऐतिहासिक महत्व रहेकाले यसको संरक्षण र प्रवद्धनमा संघ, प्रदेश र स्थानीय सरकारले समन्वय गरेर अघि बढ्नुपर्नेमा जोड दिएका थिए ।
कार्यक्रममा नेपाली सेनाको पुरानो गोरख गण, हेमकर्ण सामुदायिक वन समूह, संचारकर्मी, जिल्लास्तरीय दोहोरी गीत प्रतियोगिताका विजेता लगायतलाई सम्मान गरिएको थियो । कार्यक्रममा नेपाली सेनाको प्रस्तुति, तामाङ नृत्य र लोकगित र दोहारी प्रस्तुत गरिएको थियो ।