सवारी दुर्घटनामा ७ जनाको मृत्यु

१२ माघ, काठमाडौं । देशका विभिन्न स्थानमा भएका सवारी दुर्घटनामा ७ जनाको मृत्यु भएको छ । काभ्रे, तनहुँ, झापा, चितवन, कञ्चनपुर, रुपन्देही र सिन्धुलीमा भएका सवारी दुर्घटनामा परी ७ जनाको मृत्यु भएको हो ।
तनुहुँको आबुखैरेनी गाउँपालिका–१ सत्रसयस्थित सडकमा ग१७ प ६३४८ नम्बरको मोटरसाइकल ना१ ज ९८४७ नम्बरको म्याजिक भ्यानसँग ठक्कर खाँदा मोटरसाइकलमा सवार स्थानीय २१ वर्षीय चन्द्र थापाको मृत्यु भएको  छ । दुर्घटनामा घाइते मोटरसाइकल चालक बन्दिपुर गाउँपालिका–१ छापका १९ वर्षीय आषिश आलेको उपचार भइरहेको छ ।
झापाको दमक नगरपालिका–१० नयलबारीस्थित सडकमा को३५ प १०५५ नम्बरको मोटरसाइकल अनियन्त्रित भई दुर्घटना हुँदा चालक मोरङ उर्लाबारी नगरपालिका(९ बस्ने ३१ वर्षीय धिरेन तामाङको मृत्यु भएको छ । यता, काभ्रेको पाँचखाल नगरपालिका–५ सैंतिस किलोस्थित सडकमा बा।४ ख ११४५ नम्बरको टिपरले बा.८५ प ६०२६ नम्बरको मोटरसाइकललाई ठक्कर दिँदा मोटरसाइकल चालक मण्डन देउपुर नगरपालिका–७ का ३२ वर्षीय प्रदिप श्रेष्ठको मृत्यु भएको छ ।  
चितवनको ईच्छाकामना गाउँपालिका–४ कुरिनटारमा प्रदेश नम्बर ३ ०२ ०१२ प ४४४१ नम्बरको मोटरसाइकलको ठक्करबाट पैदलयात्री स्थानीय ८६ वर्षीय गज बहादुर गुरुङको मृत्यु भएको छ । कञ्चनपुरको पुनर्बास नगरपालिका–२ अम्रैयामा नम्बर नखुलेको ट्याक्टरको ठक्करबाट पैदलयात्री २४ वर्षीय कुल बहादुर सार्कीको घटनास्थलमै मृत्यु भएको छ । रुपन्देहीको मायादेबी गाउँपालिका–५ पर्सहवामा लु१७ प ७११२ नम्बरको मोटरसाइकल अनियन्त्रित भई पल्टदा मोटरसाइकलमा सवार लुम्बिनी साँस्कृतिक नगरपालिका–१० महिलावारका १९ वर्षीय गोकर्ण तिवारीको मृत्यु भएको छ ।
यता, सिन्धुलीको कमलामाई नगरपालिका–२ भद्रकाली मन्दिरस्थित सडकमा पनि बा४ ख ६९६ नम्बरको हाईस अनियन्त्रित भई दुर्घटना हुँदा काठमाडौं महानगरपालिका–११ गोठाटार बस्ने ३८ वर्षीय मोहन महर्जनको घटनास्थलमै मृत्यु भएको छ । दुर्घटनामा घाइते भएका अन्य १० जनाको जिल्ला अस्पताल सिन्धुलीमा उपचार भइरहेको प्रहरीले जनाएको छ ।