किन हुँदैछ सोमबार साँझ एभोकाडोमा मूख्यमन्त्रीको रात्रीभोज ?

१३ माघ, हेटौंडा । हेटौंडाको होटल एभोकाडोमा मूख्यमन्त्री डोरमणी पौडेलबाट रात्रीभोजको आयोजना हुने भएको छ । मूख्यमन्त्री तथा मन्त्रीपरिषदको कार्यालयद्वारा सोमबार साँझ ५ बजे रात्रीभोजको आयोजना हुने भएको हो । 

सांसदहरुलाई पठाईएको एसएमएसमा एभोकाडोमा मूख्यमन्त्री तथा मन्त्रीपरिषद कार्यालयको धन्यवाद ज्ञापनसहित रात्रीभोजको आयोजना हुने भएकाले उपस्थितिका लागि जानकारी गराईएको छ । मूख्यमन्त्रीले राजधानी र नामाकरण टुंगो लगाउन सहयोग गरेकोमा सांसदहरुलाई धन्यवाद ज्ञापनसहित रात्रीभोजको आयोजना गरेको एक सांसदले बताए । सुशासनसम्बन्धी विधेयकमाथिको सैद्धान्तिक छलफल सकिएकै दिन मूख्यमन्त्रीद्वारा सांसदहरुलाई रात्रीभोज राख्नुलाई सांसदहरुले बेग्लै ढंगले अर्थ्याएका छन् ।

मूख्यमन्त्रीले प्रक्रियागत ढंगबाट निर्णय भएको विषयमा धन्यवाद ज्ञापन गर्न रात्री भोज नै दिनुले सुशासनको ‘बाटो बिराएको’ ति सांसदले बताए । ‘भन्दा विरोध गरेजस्तो हुने तर सुशासनको विधेयकमाथि बोलेकै साँझ यस्तो गलत अभ्यासमा सहभागी हुन निम्तो आएको छ ।’–उनले भने–‘धन्यवाद ज्ञापन नै गर्नुपर्ने भए संसदको रोष्टमै गएर धन्यवाद ज्ञापन गरेको भए हुन्थ्यो ।’–उनले भने । 

सदाचारको मूल्यमान्यतामा पनि भोजभतेर घटाउनु जरुरी रहेको भन्दै उनले मूख्यमन्त्रीबाट सुशासन विपरित कामको शुरुवात हुनु दुःखद भएको उनले बताए । आफु त्यस्तो कार्यक्रमको साक्षी नहुने उनले बताए । अर्का सांसदले पनि रात्री भोजको विरोध गरेका छन् । उनले पनि २/४ लाख रुपैँया आर्थिक भारको कुरा मात्रै नभई यसले प्रदेशमा सुशासनको अवस्था कस्तो हुँदैछ भन्ने देखाउँछ । ‘भोज नै गरेर धन्यवाद दिनुपर्ने आवश्यकता किन पर्यो मूख्यमन्त्री ज्यूलाई ?’–उनले सोधे–‘बरु ढिलो गरेर भनेपनि बल्ल आफ्नो कर्तव्य पुरा भयो भन्ने बोध हुनुपर्ने हैन र ?’
रात्रीभोजको निम्तो प्रदेशसभाका सदस्यलाई मात्रै आएको बुझिएको छ । संचारकर्मीहरुलाई कुनै औपचारिक निम्तो नआएको पत्रकार महासंघ मकवानपुरका पदाधिकारीहरुको भनाई छ ।