वनको आन्दोलन अझ सशक्त बनाउने प्रतिवद्धता

१३ माघ, हेटौंडा । बागमती प्रदेश सरकारले ल्याएको वन ऐन २०७६ सामुदायिक वनको मर्म र भावना विपरित रहेको भन्दै आन्दोलित सामुदायिक वन उपभोक्ता महासंघ, मकवानपुरमा वृहत अन्तरक्रिया कार्यक्रम भएको छ । सामुदायिक वन उपभोक्ता महासंघ, मकवानपुरका अध्यक्ष साधुराम चौलागाईको अध्यक्षतामा कार्यक्रम भएको हो । 
अन्तरक्रिया कार्यक्रममा सहभागीहरुले सरकारले सामुदायिक वनमा अनावश्यक कर लगाउनुको साथै सामुदायिक वनको भावनामा गम्भीर चोट पुग्ने गरी वन ऐन ल्याएको बताएका छन् । सरकारले ल्याएको नयाँ वन ऐन २०७६ ले सामुदायिक वनका उपभोक्ताहरुको अधिकार खोसिएकाले आन्दोलनको विकल्प नभएकोमा जोड दिएका थिए । कार्यक्रममा बाग्मती प्रदेशका सदस्य रामहरि चौलागाई, स्थानीय महासंघ, हेटौडाका अध्यक्ष शम्भुप्रसाद न्यौपाने विभिन्न सामुदायिक वनका अध्यक्ष तथा प्रतिनिधिहरुको सहभागिता थियो । 
महासंघले माघ १७ गते नयाँ वन ऐन जलाउने, प्रदेश वन मन्त्रालयद्धारा संचालित सम्पूर्ण गतिविधी बहिष्कार गरी समूह बाहिर काठ दाउरा लगायतका वनपैदावार निकासी बन्द गर्ने माघ २० गते सम्पूर्ण डिभिजन वन कार्यालयमा तालाबन्दी गरी एक घण्टा धर्ना दिने र अनिश्चितकालीन प्रदेश वन मन्त्रालय घेराउ गरि सोहि समयमा वन ऐन जारी गर्न मुख्य भूमिका खेल्ने व्यक्तिहरुको पुत्ला जलाउने कार्यक्रम सार्वजनिक गरेको छ । 
यस अघि महासंघले माघ ८ गते बाग्मती प्रदेशका उद्योग, पर्यटन, वन तथा वातावरण मन्त्री अरुण नेपाललाई ज्ञापन पत्र बुझाएको थियो ।