गाँजाखेतिलाई बैधानिकता दिन खतिवडाद्वारा संसदमा प्रस्ताव पेश

१४ माघ, हेटौंडा । नेकपाका सांसद विरोध खतिवडाले गाँजाखेतिलाई बैधानिकता दिन माग गर्दै प्रतिनिधिसभामा प्रस्ताव दर्ता गराएका छन् । 
मकवानपुरका प्रतिनिधिसभा सांसद खतिवडाले गाँजा खेतिलाई बैधानिकता दिन माग गर्दै प्रतिनिधिसभामा विशेष महत्वको प्रस्ताव दर्ता गराएका हुन् । सांसद खतिवडा प्रस्तावक रहेको विशेष महत्वको प्रस्तावको समर्थकमा पूर्वसभामुख ओनसरी घर्ति, पूर्वगृहमन्त्री जनार्दन शर्मासहित ४२ जना छन् । नेपाल प्रहरीका पूर्वडिआईजी एवं नेकपाका सांसद नवराज सिल्वालले पनि यसलाई समर्थन गरेका छन् । प्रस्ताव दर्ताबारे प्रतिक्रिया दिंदै सांसद खतिवडाले विश्वका धेरै देशले व्यवसायिक गाँजाखेतिबाट लाभ हासिल गरिरहदा नेपालीले भने जेल बस्नुपर्ने अवस्था अन्त्य हुनुपर्ने बताए । उनले प्रस्तावबारे संसदमा छलफल हुने बताए । 
मकवानपुरको पश्चिमी क्षेत्र गाँजाखेति हुने क्षेत्र हो । त्यही क्षेत्रबाट निर्वाचित सांसद खतिवडासहित कतिपय जनप्रतिनिधिले पनि गाँजाखेतिलाई बैधानिकता दिनुपर्ने आवाज उठाउँदै आएका छन् । गाँजाखेति र ओसारपसारमा संलग्न भएको अभियोगमा त्यस क्षेत्रका धेरै स्थानीय जेलमा सजाय काटिरहेका छन् । तर पनि गाँजाखेति र कारोबार रोकिएको छैन ।