मकवानपुर प्रहरीद्वारा नेवारपानीबाट अफिम र गाँजा सहित २ जना पक्राउ

१६माघ, हेटौंडा।मकवानपुर प्रहरीले दिनहुँ जसो लागु औषध गाँजा र अफिम सहित मानिस र त्यसमा संलग्न कारोबारी पक्राउ गरिरहेको छ। प्रत्येक दिन जिल्लाको विभिन्न स्थानबाट लागु औषध बरामद गरिरहदा यसको असरप्रसारमा भने कमि आउँन सकेको छैन।

प्रहरीले हिजो बुधबार मात्रै गोलि चलाएर हेटौंडा ११बाट ३२ किलो लागुऔषध गाँजा सहित ३ जनालाई पक्राउ गरेपनि आज बिहिबार पनि ३०० ग्राम अफिम  र ६३ किलो लागुऔषध गाँजा सहित २ जना मानिसलाई पक्राउ गरेको छ।

बिहीबार बिहान इलाका प्रहरी कार्यालय नेवारपानीबाट प्रहरी नायब निरीक्षक राजेश कुमार यादवको टोलिले मनहरीबाट हेटौडा जाँदै गरेको बा३च ५९९७ नम्बरको पिकअप गाडीलाई रोकि चेकजाँच गर्दा ३०० ग्राम अफिम  र ६३ किलो गाँजा सहित २ जनालाई पक्राउ गरेको जिल्ला प्रहरी कार्यालय मकवानपुरका प्रहरी उपरीक्षक सुशिल सिंह राठौरले बताएका छन्।चरेश र गाँजा सहित पक्राउ पर्नेमा पिकअपका चालक बारा पर्सौनी  गाउँपालिका वडा नम्बर ६ का २८ वर्षीय को रामजी साह तेली र बारा अदर्स कोतवाल गाउँपालिका वडा नम्बर २ का ३० वर्षीय प्रेम पटेल रहेको उपरीक्षक राठौरले जनाएका छन्। 

उनिहरुले गाडीको पछाडिको भागमा फल्स बटम बनाएर लुकाइएको ल्याएको अवस्थामा २१ वटा पोकामा उक्त परिणामको गाँजा फेला परेको जनाइएको छ।उनिहरूले दुवैमाथि लागुऔषध नियन्त्रण ऐन, २०३३ अनुसार मुद्दा दर्ता गरी आवश्यक अनुसन्धान थालिएको प्रहरीले जनाएको छ।अफिम कारोबारीलाई १५ देखि जन्मकैद र पाँच लाखदेखि २५ लाख रुपैयाँसम्म जरिवाना हुने व्यवस्था रहेको जिल्ला प्रहरी कार्यालय मकवानपुरमा प्रहरी प्रवक्ता टिका बहादुर कार्कीले बताएका छन।