दिव्यतारा र रेडियो मकवानपुरको बार्षिकोत्सवःमकरीमा निशुल्क स्वास्थ्य शिविर

१८माघ,हेटौँडा।दिव्यतारा बहुउद्देश्यीय सहकारी संस्था लिमिटेडको बार्षिकोत्सव तथा सहकारीद्वारा सञ्चालित रेडियो मकवानपुरको दशौं बार्षिकोत्सवको अवसरमा निशुल्क स्वास्थ्य शिविरको आयोजना गरिएको छ ।
सहकारी र रेडियोको बार्षीकोत्सवको अवसरमा शनिबार मनहरी गाउँपालिकाको १ मकरीमा भएको स्वास्थ्य शिविरमा ३१० जनाले सेवा लिएका हुन ।स्वास्थ्य शिविर  मनहरी गाउँपालिका र मनहरी १ नम्बर वडा कार्यालयको सहयोग एवम् चुरेहिल अस्पताल प्रा.लि र सुविधा पोलिक्लिनिकको प्राविधिक सहयोगमा आयोजना गरिएको थियो ।
कार्यक्रम बागमती प्रदेश नेपाली कांग्रेसका संसदीय दलका नेता ईन्द्रबहादुर बानियाँको प्रमुख आतिथ्यतामा भएको थियो ।कार्यक्रममा बोल्दै प्रमुख अतिथि बानियाँले सहकारी र मिडियाले स्वास्थ्य शिविरको आयोजना गरेर ग्रामीण भेगका जनतालाई सेवा गरेको भन्दै खुसी व्यक्त गरेका छन  । सहकारीका अध्यक्ष महालक्ष्मी उपाध्याय डीनाले दिव्यतारा र रेडियो मकवानपुर जनताप्रति उत्तरदायी रहेको भन्दै आगामी दिनमा पनि सामाजिक कार्यले निरन्तरता पाउने बताइन् ।त्यसैगरी कार्यक्रममा बोल्दै मनहरी गाउँपालिकाका अध्यक्ष एकराज उप्रेतीले सहकारी र मिडिया समुदायप्रति लक्षित हुनु आवश्यक रहेको बताए । 
त्यसैगरी मनहरी गाउँपालिका १ नम्बर वडा अध्यक्ष शिवप्रसाद खनालले स्वास्थ्य शिविर कार्यक्रमले सर्वसाधारण लाभान्वित भएको बताए ।कार्यक्रममा चुरेहिल अस्पतालका हाडजोर्नी तथा नसारोग विशेषज्ञ डाक्टर जयराज शर्मा , जिल्ला सहकारी संघका सचिव दिनेश उपाध्याय, दिव्यतारा सहकारीका सचिव गणेश भेटवाल, नेपाली कांग्रेस मकवानपुर सल्लाहकार भरत पराजुली, नेता शंकर न्यौपाने, चुरेहिल अस्पतालका सञ्चालक नारायणलाल श्रेष्ठ, वडा सदस्यहरु नवराज पौडेल, सावित्री घिमिरे, सोमलक्ष्मी प्रजा, अक्कलबहादुर थिङसहित विभिन्न संघसंस्थाका प्रमुख प्रतिनिधिहरुको आतिथ्यता रहेको थियो ।

कार्यक्रम मार्फत रेडियो मकवानपुर सञ्चालक समितिका अध्यक्ष आनन्दराम पराजुलीले रेडियोको बार्षिकोत्सव र सहकारीको स्थापना दिवसको अवसरमा गरेको कार्यक्रमको बिषयमा जानकारी गराएका थिए । शिविरमा प्रेसर, सुगर तथा हाडजोर्नीका बिरामीले सेवा लिएको रेडियोका स्टेसन संयोजक गणेश दर्पण अधिकारीले बताए ।