एमाले संविधान कार्यान्वयनको पक्षमा : माधव नेपाल

२८ फागुन, हेटौडा । नेकपा एमालेका बरिष्ठ नेता माधवकुमार नेपालले नेकपा एमाले संविधान कार्यान्वयनको पक्षमा रहेको बताएका छन् । 
हेटौँडामा शनिबार मकवानपुरको पहिलो टेलिभिजन टिम टेलिभिजन र मकवानपुर सामुदायिक भिजन प्रालीको नवनिर्मीत भवन उद्घाटन एवं डिजिटल प्रसारण शुभारम्भ गर्दै नेता नेपालले नेकपा एमालेले संविधान कार्यान्वयनका लागि दवाव दिन मेचि–महाकाली अभियान थालेको बताए । 

संविधान कार्यान्वयनका लागि बैशाख ३१ गते स्थानीय निकायको निर्वाचनसहित २०७४ माघ ७ गतेसम्ममा सबै निर्वाचन सम्पन्न भई नयाँ सरकारले जिम्मेवारी लिनुपर्ने उनको जोड थियो । सामाजिक विद्वेष, हिंसा भड्काउन मधेशी मोर्चा र वर्तमान सरकार उद्धत रहेको भन्दै नेता नेपालले आफुहरु यसको विरोधमा रहेको बताए । मधेशी मोर्चाको इशारामा वर्तमान सरकारले राष्ट्रघाती काम गरिरहेको समेत उनको आरोप छ ।

कार्यक्रममा सांसद गणेश थापा, नेकपा एमालेका पोलिटव्युरो सदस्य नागेन्द्र चौधरी, केन्द्रीय सदस्य बिरोध खतिवडा, क्षेत्रीय प्रशासक शम्भु कोइराला, प्रमुख जिल्ला अधिकारी नारायण प्रसाद दुवाडी, प्रहरी उपरिक्षक बसन्त लामा, टिम टेलिभिजनका प्रबन्ध निर्देशक भिमसेन महत, टिम टेलिभिजनका उपाध्यक्ष अशोक डंगोल लगायत जिल्ला तहका राजनीतिक दलका नेताहरुको उपस्थिती रहेको थियो ।

५० लाखको लागतमा टेलिभिजनको भवन निर्माण गरिएको टिम टेलिभिजनका अध्यक्ष नवराज खतिवडाले बताए । आफ्नै भवनबाट इन्टरनेटसहित डिजीटल केबल टोलिभिजन सञ्चालन गरिएको बताउँदै मकवानपुर सामुदायिक भिजन प्रालीका अध्यक्ष ध्रुब पराजुलीले अब केबलबाटै इन्टरनेट सेवा प्रदान गरिने जानकारी दिए ।