मुद्धा मिलाउन घुस लिने तत्कालिन सिडिओविरुद्ध मुद्धा दायर

२० माघ, काठमाडौं । जिल्ला प्रशासन कार्यालय दोलखाका तत्कालिन सीडीओ खगेन्द्रप्रसाद रिजालविरुद्ध अख्तियार दुरुपयोग अनुसन्धान आयोगले अभियोग पत्र दायर गरेको छ ।
अख्तियारले उपसचिव रिजालविरुद्ध ६ लाख २१ हजार १ सय रुपैयाँ बिगो कायम गरी ५ वटा अभियोग पत्र दायर गरेको हो । सार्वजनिक अपराधको मुद्दा मिलाइदिने भन्दै मुद्दाका अभियुक्तसँग घुस लिएको आरोप लागेको छ । रिजालले एउटा मुद्दाका अभियुक्तसँग १ लाख ५० हजार रुपैयाँ नदिए ५ वर्षसम्म जेलमा थुनिदिन्छु भन्दै घुस लिए देखिएको अख्तियारको छ । यस्तै, रिजालले एकजना अभियुक्तलाई महिलासम्बन्धी मुद्दा लगाएर थुनिदिन्छु भन्दै ४ लाख रुपैयाँ घुस लिएको पृष्टि भएको पनि अख्तियारले जनाएको छ ।
अख्तियारले गरेको छानबिनका क्रममा रिजालले विभिन्न अभियुक्तसँग ४ लाख, ५० हजार, ९० हजार, ७७ हजार ६ सय र ३५ हजार रुपैयाँ गरी ६ लाख २१ हजार १ सय रुपैयाँ घुस लिएको देखिएको छ । अख्तियारले फरक प्रकरणको मुद्दामा लिइएको घुसको फरक–फरक तथ्यबाट अनुसन्धान गरी सोही अनुसार प्रतिवेदन बनाएर ५ वटा छुट्टछुट्टै अभियोग पत्र विशेष अदालतमा दायर गरेको छ । अख्तियारले ५ वटै अभियोग पत्रमा गरी कूल ६ लाख २१ हजार १ सय रुपैयाँ बिगो कायम गर्दै ४ वर्ष २ महिना कैद सजाय मागदाबी गरेको छ ।