प्रथम हेटौंडा रनमा यादव र श्रेष्ठ विजयी

२५ माघ, हेटौंडा । प्रथम हेटौंडा रनको उपाधी अजित यादव र सन्तोषी श्रेष्ठले हात पारेका छन् । 
शनिबार भएको दौडमा पुरुष तर्फ १० किलोमिटर दौडको उपाधि एपिएफका अजिकुमार यादव र महिलातर्फ ५ किलोमिटर दौडको उपाधि बागमती प्रदेशकी सन्तोषी श्रेष्ठले जितेका छन् । उद्योग, पर्यटन, वन तथा वातावरण मन्त्रालय, बागमती प्रदेशको आयोजना र पर्वतीय खेलकुद महासंघ बागमती प्रदेशको संयोजनमा भएको कार्यक्रममा पुरुषतर्फ विजेता यादवले ३१ मिनेट ६ सेकेण्डमा दुरी पार गरेका थिए । नेपाली सेनाका टंक कार्की दोस्रो, एपिएफका गणेशसिंह ठकुरी तेस्रो, नेपाली सेनाका शिव रायमाझी चौथो र जिवन लामाले पाँचौ भए । 
महिलातर्फ विजेता श्रेष्ठले १८ मिनेट १० सेकेण्डमा दुरी पार गरेका थिए । नेपाल प्रहरीकी राजपुरा पछाइ दोस्रो, नेपाली सेनाकी सरस्वती भट्टराई तेस्रो, नेपाल प्रहरीकी बिर्सना कुमाल चौथो र बागमती प्रदेशकी जुनेली सुनारले पाँचौ भए । प्रतियोगितामा प्रथम हुनेले नगद ५० हजार, दोस्रोले ३० हजार, तेस्रोले २० हजार, सन्त्वना पुरस्कारतर्फ नगद १० हजार र ५ हजार रुपैंयासहित प्रमाण पत्र, मेडल तथा शिल्ड प्राप्त गरेका थिए ।
भ्रमण वर्ष २०२० लाई प्रवद्धन गर्ने उद्देश्यले गरिएको प्रतियोगितामा पुरुषतर्फ ४ सय ७५ जना, महिलातर्फ ३ सय ९५ जना तथा सहभागितामुलक फन रनमा ४ हजार ७ सय बढिको सहभागिता रहेको थियो ।
हेटौँडा ४ हुप्राचौरबाट सुरु भएको दौड नगरको विभिन्न वडा परिक्रमा गरी पुनः हुप्राचौरमै आएर समापन भएको थियो ।