फुँयाल दोस्रो पटक ‘झण्डै’ मन्त्री, यस्तो छ कारण

२९ माघ, हेटौंडा । बागमती प्रदेश सरकारको विस्तार हुन मन्त्रीपरिषदमा नेकपाका मूख्य सचेतक रामेश्वर फुँयाल दोस्रो पटक ‘झण्डै’ मन्त्री बनेका छन् । प्रदेश सरकार गठनदेखि प्रदेशको राजधानी र नामाकरणसम्मको अवधीमा संसदमा मूख्यमन्त्री डोरमणी पौडेलको ‘खम्बा’ बनेर उभिएका उनी दोस्रो पटक ‘झण्डै’ मन्त्री बनेका हुन् । 
प्रदेशको राजधानी र नामाकरणको टुंगो लागे लगतै फुँयाल भौतिक पूर्वाधार विकास मन्त्री बन्ने चर्चा शुरु भयो । यसबारे मूख्यमन्त्री र नेकपाका शिर्ष नेतासम्म अन्तिम चरणमा पुगिसकेका थिए । फुँयालले पनि संचारमाध्यममा मन्त्री हुने आसयकै प्रतिक्रिया दिएका थिए । तर चर्चा भएको एक साता पनि नपुग्दै उनको मन्त्री बन्ने बाटोमा अवरोध उत्पन्न भयो । ‘उहाँको छिट्टै प्रतिक्रिया दिने प्रवृत्तिका कारण चर्चा सेलाएको हो ।’–चर्चा सेलाएपछि संचारकर्मीसंग एक नेकपाका प्रभावशाली प्रदेशसभा सदस्यले प्रतिक्रिया दिएका थिए । त्यही दिन फुँयाललाई प्रमुख प्रतिपक्ष दलका नेता इन्द्रबहादुर बानियाँले मन्त्री बन्ने चर्चाबारे चर्चा मात्रै नभई मन्त्री नै बन्न शुभकामना दिएका थिए । बानियाँले व्यंग्यात्मक ढंगबाट हिन्दी गीत ‘मुन्नी बदनाम हुई, डार्लिङ तेरे लिए’ भने झैं नाममात्रै आएर सेलाउने अवस्था नआओस् भनेका थिए । तर फुँयाल दोस्रो पटक मन्त्रीको सपथग्रहण हुने टुंगिएर ‘झण्डै’ मन्त्री बन्न पुगेका छन् । 
नेकपाका नेताहरुको विवाद फुँयालको सपथका लागि अवरोध बन्यो । बुधबार अपरान्ह ४ बजे सपथग्रहणको लागि प्रदेश प्रमुखको कार्यालयलाई अनौपचारिक जानकारी दिईपनि नेताहरुको विवादका कारण बुधबार मूख्यमन्त्री कार्यालयमा प्रदेश सरकारको दोस्रो बार्षिकोत्सवको कार्यक्रम शुरु भईरहदा स्थगित खबर बाहिर आयो । विहान भरी भौतिक पूर्वाधार बिकास मन्त्री बन्ने समाचारमा छाएर सपथ रोकिएपछि फुँयाल निरास देखिन्थे । संचारकर्मीहरुसंग हसिलो मुद्रामा कुरा गर्न आईपुग्ने फुँयाल बुधबार संचारकर्मीहरुको सम्पर्क आउन हिच्किचाईरहेका देखिन्थ्ये । उनको मन्त्री बन्ने सपनामा सामाजिक विकास मन्त्री युवराज दुलाल ‘बाधक’ बने । 
दुलाल मन्त्रालय परिवर्तन गरी भौतिक पूर्वाधार मन्त्रालयमा जान खोजेका कारण बुधबारको सपथ रोकिएको नेकपाका नेताहरुले अनौपचारिक कुराकानीमा बनाएका थिए । प्रचण्डले दुलाललाई भौतिक मन्त्री बनाउन खोजेपछि बुधबारको सपथ रोकिएको छ । अब छिटै यसबारे नयाँ ढंगबाट छलफल हुने मूख्यमन्त्री निकट स्रोतको भनाई छ ।