शुक्रबारबाट सालक पार्कमा हुने महायज्ञको तयारी पुरा

१ फागुन, हेटौंडा । हेटौंडा–१७ मा रहेको सालक पार्कमा शुक्रबारबाट हुने महायज्ञको तयारी पुरा भएको आयोजकले जनाएको छ ।
चुच्चेखोला सामुदायिक वन समूहका अध्यक्ष एवं महायज्ञ मुल समारोह समितिका संयोजक अर्जुन दाहालले महायज्ञको तयारी पुरा भएको बताएका हुन् । महायज्ञको प्रचारप्रसारका लागि विहिबार मोटरसाइकल र्याली भएको छ । सालक पार्कबाट शुरु भएको र्याली हेटौंडाको राजदेवी, दोभानचौर, फुर्केचौर, ठूलोदमार, हटिया, चिसापानी, रगशाला, पुतलीबजार, चौघडा हुँदै पुन सालक पार्कमा पुगेको थियो । सप्ताह शुरु हुनु अघि शुक्रबार कलश यात्रा हुने जनाईएको छ । 
फागुन १० गतेसम्म हुने महायज्ञमा नारी रत्न विदुषी अनुराधा शास्त्रीले कथावाचन गर्ने जनाईएको छ । महाशिव रात्री र नेपाल भ्रमण वर्ष २०२०को अवसर पारी आध्यात्मिक चिन्तनद्वरा राष्ट्र, शान्ति, लोक कल्याण र  विश्वकै लापोन्मुख सुचिमा परेको सालकको संरक्षण र पार्कको विकासको लागि महायज्ञ हुन लागेको आयोजकले जानकारी दिएको छ । 
महायज्ञका लागि १७ वटा उपसमिति गठन गरिएको प्रचारप्रसार उपसमिति संयोजक नवराज न्यौपानेले जानकारी दिए । महायज्ञबाट करिब १ करोड संकलन हुने र करिब १५ लाख रुपैँया खर्च हुने अनुमान आयोजकले गरेको छ । महायज्ञको बागमती प्रदेशका मुख्यमन्त्री डोरमणि पौडेलले उद्घाटन गर्ने आयोजकले जानकारी दिएको छ ।