हेटौंडाका बैंक म्यानेजरलाई खुकुरी देखाउनेलाई ७ दिन म्याद थप

Google Image

४ फागुन, हेटौंडा । नेपाल बैंक लिमिटेड हेटौंडाका शाखा प्रमुख (म्यानेजर) लाई काट्छु भन्दै खुकुरी देखाउनेलाई ७ दिनको म्याद थप गरिएको छ । जिल्ला अदालत मकवानपुरले हेटौंडा–४ चिल्ड्रेन पार्कका ४४ बर्षीय गजेन्द्रराज गिरीलाई अनुसन्धानका लागि ७ दिनको म्याद थप गरिएको हो । 
जिल्ला अदालत मकवानपुरका न्यायाधिश डिल्लीरत्न श्रेष्ठको एकल इजलासले उनलाई ७ दिनको म्याद थप गरेको तहसिलदार तुलसीप्रसाद लामिछानेले जानकारी दिए । शुक्रबार पक्राउ गरिएका उनलाई सार्वजनिक सेवा अवरुद्ध सम्बन्धी कसुरमा प्रहरीले म्याद थपका लागि आइतबार अदालत पेश गरेको थियो । गिरीले प्रमुखलाई काट्नु भन्दै सिरुपाते खुकुरी देखाईरहेको जानकारी आएपछि पुगेको प्रहरी टोलीले बन्दुक देखाएर गोली हान्ने चेतावनी दिएपछि गिरीले खुकुरी छोडेको प्रहरीले जनाएको छ ।

के छ कानूनी प्रावधान ?
मुलुकी अपराध संहिता २०७४ को दफा ६८ मा ‘सार्वजनिक सेवा अवरुद्ध गर्न नहुनेः (१) कसैले सार्वजनिक विद्युत वा दूरसञ्चार वा त्यस्तै प्रकृतिका अन्य सार्वजनिक सेवा वा कानून बमोजिमको सार्वजनिक सेवा सञ्चालनमा कुनै किसिमको डरत्रास, देखाई बन्द गर्न वा कुनै किसिमले अवरुद्ध गर्न हुँदैन । (२) उपदफा (१) बमोजिमको कसूर गर्ने वा गराउने व्यक्तिलाई तीन वर्षसम्म कैद वा तीस हजार रुपैयाँसम्म जरिबाना हुनेछ ।’ उल्लेख छ ।
यो पनि पढ्नुस्     नेपाल बैंक हेटौंडाका प्रमुखलाई काट्छु भन्दै खुकुरी देखाउने गिरी पक्राउ