मुख्यमन्त्रीको ‘मापसे’ भोज सामाजिक संजालमा भाइरल !

५ माघ, काठमाडौं । नेपाल संघीय लोकतान्त्रिक गणतन्त्रमा प्रवेश गरेपछि राज्य र समाजमा नयाँ मूल्य–मान्यता र सुशासनको अपेक्षा आम रूपमा गरिएको थियो । तर, जनताप्रति जवाफदेही बनाउने गरी शक्तिको बाँडफाँड भएपनि त्यहाँ निर्वाचित भई कार्यभार सम्हाल्नेहरूले क्रियाकलापले भने संघीय प्रणाली थप जटिलतातिर जाने र कतै बद्नाम नै हुने त होइन भन्ने आशंकासमेत सिर्जना भएको छ ।
प्रसंग हो, गण्डकी प्रदेशका मुख्यमन्त्री पृथ्वी सुब्बा गुरुङको । संघीय सरकारले प्रदेशलाई अधिकार दिन नचाहेको, संघीयताको मर्मअनुरूप नचलेको र संघीयतालाई देखावटी माध्यम बनाएर असफल पार्ने प्रयत्न गरिएको भनी बारम्बार बताइराख्ने मुख्यमन्त्री पृथ्वीसुब्बा गुरुङ आफ्नै हर्कतका कारण सामाजिक सञ्जालमा यतिखेर चर्चामा छन् । उनले गरेको मदिरापान पार्टी सार्वजनिक भएपछि सकारात्मक सन्देश दिएको छैन । मुख्यमन्त्री जस्तो जिम्मेवार र संघीयता कार्यान्वयनको सन्देशसमेत दिने उत्तरदायित्वसमेत रहेको पदाधिकारीले यस्ता खालको क्रियाकलाप गर्दा कस्तो खालको सन्देश जान्छ भन्ने कुरामा विचार नपुर्याएको समाचार साँघुमा छ । हातमै रक्सीको बोतल लिएर मापसे पार्टी गरेको भिडियो सार्वजनिक हुँदा नेकपाको जिम्मेवार नेता तथा मुख्यमन्त्रीलाई नसुहाउने तर्क अहिले सामाजिक संजालमा गरिएको छ । हालै ११ बुँदे आचारसंहित जारी गरेको नेकपाका नेता समेत रहेका मुख्यमन्त्री गुरुङको यस्तो गतिविधि सामाजिक सञ्जालमा भाईरल भएको छ । 
मुख्यमन्त्रीको निजी सचिवालयको  ध्यानाकर्षण
गण्डकी प्रदेशका मुख्यमन्त्री पृथ्वीसुब्बा गुरुङको कार्यकक्षमै मदिरापान गरे भन्ने विषयमा आएका समाचारप्रति मुख्यमन्त्रीको निजी सचिवालयले गम्भीर ध्यानाकर्षण भएको जनाएको छ । सचिवालयले २०७६ फागुन ४ गते  विज्ञप्ति जारी गरी मुख्यमन्त्रीलाई जोडेर सामाजिक सञ्जाल एवं विभिन्न सञ्चारमाध्यममा सार्वजनिक भिडियो, फोटा र समाचारप्रति गम्भीर ध्यानाकर्षण भएको जनाएको हो ।
फागुन २ गते मुख्यमन्त्रीको जन्मदिन भएको र सोही अवसरमा जेठानका परिवार बेलायतबाट आएकाले मुख्यमन्त्री निवासमा पाहुनाको खानाको प्रबन्ध एवं पारिवारिक जमघटमा रहेका तस्बिरलाई अतिरञ्जित गर्नु विडम्बना भएको विज्ञप्तिमा उल्लेख गरिएको छ ।