पशुपतिमा २० लाख भक्तजनले दर्शन गर्ने अनुमान

९ फागुन, काठमाडौं । महाशिवरात्रिको अवसरमा २० लाख दर्शनार्थीले पशुपतिनाथको दर्शन गर्ने अनुमान गरिएको छ । पशुपति क्षेत्र विकास कोषले शुक्रबार महाशिवरात्रीको अवसरमा विहानदेखि राति अबेरसम्ममा २० लाख दर्शनार्थीले पशुपतिको दर्शन गर्ने अनुमान गरेको छ । 
कोषले शिवरात्रिको अवसरमा पशुपतिनाथ दर्शनमा आउने दर्शनार्थीहरूलाई  निःशुल्क भोजन, पिउनेपानी, स्वास्थ्य सेवालगायतको व्यवस्था गरेको कोषका कार्यकारी निर्देशक डा. घनश्याम खतिवडाले बताए । यस्तै, दर्शनार्थीहरूले बढीमा डेढ घन्टासम्ममा दर्शन गरिसक्ने व्यवस्था मिलाइएको उनको भनाई छ । पशुपतिमा सुरक्षाका लागि लागि ५ हजार सुरक्षाकर्मी, ५ सय सादा पोसाकका प्रहरी र १० हजार स्वयंसेवक परिचालन गरिएको छ । दर्शनार्थीहरूले बिहान चार बजेबाटै पशुपतिमा दर्शन गर्न पाउने व्यवस्था कोषले मिलाएको छ । पशुपति दर्शन गर्न चाहनेका लागि मित्रपार्क, जयबागेश्वरी, गौशाला तथा तिलगंगा गरी चारतिरबाट लाइन व्यवस्थापन गएिको छ । 
लाइन बसेकै स्थाननजिक जुत्ताचप्पलकक्ष स्थापना गरिएको कोषको भनाइ छ । दर्शनपछि चन्दन लिन चाहने भक्तले दर्शन सकेर बाहिर निस्कने स्थाननजिक कोर क्षेत्रभित्र सानो सदार्व सत्तलमा व्यवस्था गरेको छ । उमाकुण्ड, मित्रपार्क, तिलगंगा र गौशालाबाट पनि चन्दन वितरण गरिने कोषको भनाइ छ ।