पाठकद्वारा विवाह भोजको खर्च शैक्षिक कोषमा सहयोग

२० फागुन, हेटौंडा । हेटौंडा–६ का बद्रीबहादुर पाठकले आफ्नो छोराको विवाहमा गर्ने भोजको खर्च शैक्षिक सहयोग कोषमा सहयोग गरेका छन् । छोरा रविन पाठक र बुहारी रूपा चौलागाईंको विवाह भोजको खर्च रकम शैक्षिक सहयोग अक्षय कोष नेपाल मकवानपुरलाई मंगलबार सहयोग गरेका हुन् । 
उनले विवाह भोजमा हुने खर्च बापतको रकम १ लाख ५५ हजार ५ सय ५५ रूपैयाँ कोषलाई हस्तान्तरण गरेका छन् । सहयोग रकमको चेक पाठकका बुबा फत्तबहादुरले बागमती प्रदेशका मूख्यमन्त्री डोरमणी पौडेललाई हस्तान्तरण गरेका थिए भने मूख्यमन्त्री पौडेलले कोषका अध्यक्ष एवं जिल्ला समन्वय समिति मकवानपुरका प्रमुख रघुनाथ खुलाललाई हस्तान्तरण गरेका थिए । कार्यक्रममा बोल्दै मूख्यमन्त्री पौडेलले पाठक परिवारको कार्यको प्रशंसा गर्दै सबैले यसलाई अनुशरण गर्नुपर्नेमा जोड दिए । उनले भोजभतेरमा हुने फजुल खर्चलाई कटौति गर्दै सामाजिक हितको काममा खर्चनुपर्ने बताए । ‘एक छाक खाना त सबैले आफ्नो घरमा खाने गरेका छन्, तर त्यो रकम यस्तो सामाजिक कार्यमा खर्च गर्दा यसले समस्यामा परेकाहरुलाई सहयोग पुग्छ ।’–उनले भने । 
विपन्न, असहाय र जेहेन्दार विद्यार्थीलाई सहयोग गर्ने उद्धेश्यले स्थापना भएको कोषका सचिव समेत रहेका राष्ट्रिय पुर्ननिर्माण प्राधिकरण शिक्षा इकाई मकवानपुरका प्रमुख पाठकले सामाजिक सुधारको काम आफैंबाट शुरु गर्नुपर्छ भन्ने उद्धेश्यले भोजको रकम कोषमा सहयोग गरेको बताए । उनले पारिवारको सल्लाह अनुसार नै शैक्षिक सहयोग अक्षय कोषमा रकम हस्तान्तरण गरेको बताउँदै कोषमा सहयोगका लागि सबैसंग आग्रह गरेका छन् । राष्ट्रिय पुर्ननिर्माण प्राधिकरण मकवानपुरका इन्जिनियर रहेका छोरा रविनले भोजको खर्च रकम सामाजिक हितमा खर्चिने परिवारको सल्लाह सकारात्मक रहेको भन्दै यसलाई सामाजिक सन्देशका रुपमा आफुहरुले प्रस्तुत गरेको बताए ।
कार्यक्रममा पाठक परिवार, चौलागाई परिवार, कोषका प्रतिनिधिहरु, संचारकर्मी र स्थानीय समुदायको सहभागिता रहेको थियो ।