दौड प्रतियोगितामा प्रनिता र सविन पहिलो

२४ फागुन, हेटौडा । हेटौंडा–६ चौघडामा भएको ३ किलोमिटर दौड प्रतियोगितामा पुरुषतर्फ सविन गुरुङ र महिला तर्फ प्रनिता पुडासैनी प्रथम भएका छन । पुरुष तर्फ सभाष चौलागाई दोश्रो र शरण थिङ तेश्रो भएका थिए भने महिला तर्फ विनिता भट्टराई दोश्रो र गीता राई तेश्रो भएका थिए । 
१ सय १० औं अन्तराष्ट्रिय श्रमिक महिला दिवसको अवसरमा मदन भण्डारी स्पोटर्स एकेडेमी हेटौडा ६ नंं. वडा कमिटिले आयोजना गरेको प्रतियोगिताका विजयी खेलाडीहरुलाई संविधान सभा मञ्चका अध्यक्ष अनन्तप्रसाद पौडेलले पुस्कार प्रदान गरेका थिए । प्रथम हुने खेलाडीलाई नगद ५ हजार, दोश्रो हुनेलाई ३ हजार र तेश्रो हुनेलाई नगद २ हजार मेडल र प्रमाणपत्र प्रदान गरिएको थियो ।
मदन भण्डारी स्पोटर्स एकेडेमी हेटौडा–६ का अध्यक्ष सुमन लामाको अध्यक्षतामा भएको कार्यक्रममा हेटौडा उपमहानगरपालिकाकी उपममेयर मीना लामा, हेटौडा–४ का वडा अध्यक्ष एवं मदन भण्डारी स्पोटर्स एकेडेमीका केन्द्रीय सदस्य नविन सिग्देल, हेटौडा उपमहानगरपालिकाकी कार्यपालिका सदस्य कल्पना विक, मदन भण्डारी स्पोटर्स एकेडेमी जिल्ला अध्यक्ष निरजसिंह ठकुरी, कार्यक्रम संयोजक मनोज चौलागाई, नेकपाका पार्टी प्रतिनिधी लगायतको सहभागिता थियो । 
दौड प्रतियोगितामा करीब १ सय खेलाडीहरुको सहभागिता थियो ।