प्रहरीद्वारा पत्रकार साह हत्याका मूख्य योजनाकार सार्वजनिक

२५ फागुन, हेटौंडा । पत्रकार विरेन्द्र साह हत्याका मूख्य योजनाकार कुन्दन भन्ने नरेन्द्रकुमार फौजदारलाई बारा प्रहरीले पक्राउ गरी आइतबार सार्वजनिक गरेको छ ।
१२ बर्षदेखि फरार रहेका उनलाई आइतबार विहान २ बजे उनकै घर बारागढी गाउँपालिका वडा नम्बर ६ गडहल टोलबाट पक्राउ गरेको हो । फौजदार गाउँमा आई लुकिछिपि बसेको सूचनाको आधारमा पुगेको प्रहरी टोलीले घरबाटै पक्राउ गरेको पत्रकार सम्मेलनमा जानकारी दिईएको थियो । उनलाई नियन्त्रणमा लिने क्रममा परिवार र छिमेकीहरुले अवरोध गर्न खोज्दा ४ राउण्ड हवाई फायर गर्नु परेको प्रहरीले जनाएको छ । उनलाई बारा जिल्ला अदालत पेश गर्ने जनाईएको छ । 
जिल्ला अदालत बारा, तत्कालिन पुनरावेदन अदालत हेटौंडा र सर्वोच्च अदालतले फरार रहेका फौजदारको हकमा फरार करार गरी मुद्धा मुल्तवीमा राखेको थियो । कर्तव्य ज्यान मुद्धामा मनेजर गिरी र राम एकवाल सहनी अदालतले सर्वस्वसहित जन्म कैदको फैसला गरिसकेको छ । २०६४ असोज १८ गते बाराको तत्कालिन उम्जन गाविस पिप्रा बसतपुरबाट पत्रकार बिरेन्द्र साहलाई कुन्दन फौजदार भन्ने नरेन्द्र कुमार फौजदार, राम एकवाल सहनी र मनेजर गिरी समेतका ५ जना व्यक्तिहरूले अपरहण गरी लगेका थिए । 
त्यसपछि साहलाई गोली हानी हतया गरी तत्कालिन डुमरवाना गाविस वडा नम्बर ७ स्थित जंगलमा खाल्डो खनि गाडेको अवस्थामा कार्तिक २२ गते शव फेला परेको थियो ।