बारामा प्रेस लेखेको मोटरसाइकलबाट लागुऔषध बरामद

२७ फागुन, सिमरा। बारामा प्रहरीले प्रेस लेखेको मोटरसाइकलबाट लागुऔषध सहित कारोबारीमा संलग्न २ जनालाई पक्राउ गरेको छ । ईलाका प्रहरी कार्यालय सिमराले मोटरसाईकलको अगाडी प्रेस लेखि लागु औषध ओसारपसारमा संलग्न मोटरसाइकल सहित दुईजनालाई मंगलबार पक्राउ गरेको हो ।
ईलाका प्रहरी कार्यालय सिमराबाट प्रहरी नायव उपरीक्षक डिएसपी गोविन्द पुरीको कमाण्डमा खटिएको प्रहरी टोलीले त्रिभुवन राजपथ अन्र्तगत जितपुर सिमरा २ स्थित नेपाल विद्युत प्रधिकरण अगाडी जितपुरबाट सिमरा तर्फ आउदै गरेको प्रेस लेखेको ना ६२ प ६२६७ नम्बरको मोटरसाईकललाई रोकी चेकजाँच गर्दा विभिन्न नाम गरेका लागुऔषध सहित मोटरसाइकलमा सवार वीरगंज महानगरपालिका १५ बस्ने ३० वर्षीय जितेन्द्र कुमार सिह र भारत विहार घर भएका २२ वर्षीय नासिर आलमलाई पक्राउ गरिएको जिल्ला प्रहरी कार्यालय बाराले जनाएको छ । 
प्रहरीले सिंह र आलमको साथबाट डाईजीपाम तीन सय एम्पुल,नुफिन तिन सय एम्पुल र फेनारगन तिन सय एम्पुल सहित ९सय एम्पुल लागु औषध बरामद गरिएको ईलाका प्रहरी कार्यालय सिमराका डिएसपी गोविन्द पुरीले बताएका छन । पक्राउ परेका दुबै नक्कली पत्रकार बनि लागुऔषध ओसारप्रसारमा संलग्न भएको पाईएको र थप अनुसन्धान भइरहेको जनाइएको छ ।