सिन्धुपाल्चोकमा चल्ने सार्वजनिक बसमा कोरोना सम्बन्धी पर्चा

२चैत, हेटौंडा।विश्वव्यापी रूपमा फैलिरहेको नोबेल कोरोना भाइरसको संक्रमणलाई मध्यनजर गर्दै देशको विभिन्न स्थानमा हेल्प डेस्क र जनचेतनामुलक माइकिङ र कार्यक्रम भइरहेको छ। विभिन्न संघसंस्था, स्थानिय तह, प्रहरीले यस्ता कार्यक्रम गरिरहेको छन।

यसै क्रममा बागमती प्रदेश प्रहरी कार्यालय र जिल्ला प्रहरी कार्यालय सिन्धुपाल्चोकको समन्वयमा सार्वजनिक बसमा कोरोना सम्बन्धी पर्चा वितरण गरिएको छ।कोरोनाको संक्रमणबाट जोगिन जिल्ला प्रहरी कार्यालय सिन्धुपाल्चोकको यात्रु सचेतना अभियान अन्तर्गत शनिबार अरनिको राजमार्गमा चल्ने सार्वजनिक यातायातमा पर्चा वितरण गरिएको बागमती प्रदेश प्रहरी कार्यालय हेटौडाका प्रहरी निरीक्षक देवराज काफ्लेले जानकारी दिएका छन्।

बागमती प्रदेश निमित्त प्रहरी प्रमुख प्रहरी वरिष्ठ उपरीक्षक किशोर कुमार दाहाल र जिल्ला प्रहरी कार्यालय सिन्धुपाल्चोकका प्रहरी प्रमुख प्रहरी उपरीक्षक प्रज्वलन महर्जनले वनदेउ नाकामा संचालक भएका सार्वजनिक बसमा कोरोना सम्बन्धी चेतनामुलक पर्चा वितरण गरेको जनाइएको छ।

यता मकवानपुर प्रहरीको अग्रसरतामा जिल्लाको विभिन्न १० स्थानमा हेल्प डेस्क स्थापना गरिएको मकवानपुरका एसपी सुशील सिंह राठौरले बताएका छन्।