नेपालीको नाममा अक्सफोर्डमा दुई पुरस्कार स्थापना

२ चैत, काठमाडौं । अक्सफोर्ड विश्वविद्यालयले प्रोफेसर सूर्यप्रसाद सुवेदीको नाममा दुई शैक्षिक पुरस्कारको स्थापना गरेको छ। कानुन सङ्कायमा अध्ययन गर्ने विशिष्ट विद्यार्थीहरूलाई सम्मान गर्नको लागि पुरस्कार स्थापना गरिएको हो।
पहिलो पुरस्कार हरेक वर्ष मानव अधिकार र कानुनमा सर्वाधिक अङ्क प्राप्त गर्ने विद्यार्थीलाई प्रदान गरिनेछ भने दोस्रो पुरस्कार कानुन सङ्कायमा हरेक वर्ष आउने डिफिलका थेसिसमध्ये उत्कृष्ट थेसिसलाई प्रदान गरिने छ। डिफिलको उत्कृष्ट अवार्ड दिइने थेसिसले कुनै विषयमा आफ्नो मौलिक योगदान र शैली, प्रस्तुति र संरचनाको हिसाबमा पनि उत्कृष्ट हुनुपर्ने छ।
प्रोफेसर सुवेदी अक्सफोर्डका पूर्व छात्र हुन् । उनले सन् १९९३ मा अक्सफोर्डबाटै डिग्री हासिल गरेका छन्। अक्सफोर्ड विश्वविद्यालयले गत वर्ष मात्रै सुवेदीले मानव अधिकार तथा अन्तराष्ट्रिय कानुनमा पुर्‍याएको योगदानलाई कदर गर्दै अक्सफोर्ड विश्वविद्यालयबाट उच्च कामलाई मात्रै दिइने ‘उच्च डक्टरल डिग्री’को सम्मान उनलाई दिएको थियो।
सुवेदी अहिले बेलायतस्थित लिड्स विश्वविद्यालयमा अन्तराष्ट्रिय कानुनमा प्रोफेसर छन् भने लण्डनको लिङ्कस इनस्थित ‘थ्रि स्टोन्स चेम्बर्स’मा वकिल छन् ।
साभार : नेपालन्यूज