मध्यमाञ्चलमा ४६५६ र मकवानपुरमा २७९ क्षयरोगी

११ चैत, हेटौँडा । मध्यमाञ्चलमा गत साउनदेखि कार्तिकसम्ममा ४६ सय ५६ क्षयरोगी फेला परेको तथ्यांक सार्वजनिक गरिएको छ । विश्व क्षयरोग दिवसको अवसरमा शुक्रबार जिल्ला स्वास्थ्य कार्यालय मकवानपुरले गरेको कार्यक्रममा यस्तो जानकारी दिईएको हो । 
कार्यक्रममा मध्यमाञ्चल क्षेत्रीय स्वास्थ्य निर्देशनालयका क्षयकुष्ठ अधिकृत उत्तम खनालले चौमासिक तथ्यांक सार्वजनिक गर्दै मध्यमाञ्चलका १९ जिल्लामा ४६ सय ५६ नयाँ क्षयरोग फेला परेको जानकारी दिएका छन् । उनले मध्यमाञ्चलको तर्राइ क्षेत्रमा सबैभन्दा बढि ५२ प्रतिशत क्षयरोगी रहेको पनि बताए । काठमाण्डौं उपत्यकामा २७ प्रतिशत, पहाडमा २० प्रतिशत र हिमालमा १ प्रतिशत क्षयरोगी फेला परेको उनको भनाई छ । उनले मध्यमाञ्चलमा क्षयरोगको उपचारका लागि १४ सय २३ डट्स केन्द्र र शहरी क्षेत्रमा ५६ डट्स केन्द्र रहेको बताए । तथ्यांक अनुसार नयाँ क्षयरोगीमा १५–४४ बर्ष उमेर समूहका छन् ।
त्यसैगरी, मकवनपुरमा गत साउनदेखि कार्तिकसम्ममा २ सय ७९ नयाँ क्षयरोगी फेला परेका छन् । क्षयकुष्ठ अधिकृत कपिलदेव झाले तथ्यांक सार्वजनिक गर्दै कार्तिकसम्ममा १ सय ८० पुरुष, ९९ महिलामा क्षयरोगी फेला परेको बताए । जसमा ५ बालबालिका छन् । यस्तै सोही अवधिमा ७ जना क्षयरोगी बहुउपचार औषधी पद्धतिबाट उपचारमा रहेको बताए । मध्यमाञ्चलका कुल क्षयरोगीमध्ये ५.४८ प्रतिशत मकवानपुरमा छन् । मकवानपुरमा पनि हेटौँडा नगरपालिकाभित्र एक सय क्षयरोगी रहेको झाले बताए । 
लगातार दुई हप्तासम्म खोकी लागेमा क्षयरोग हुन सक्ने भन्दै खकार परिक्षणका लागि हेटौँडा अस्पताल, प्राथमिक स्वास्थ्य केन्द्र मनहरी, छतिवन, भीमफेदी, पालुङ, स्वास्थ्य चौकी फापरवारी र पदमपोखरीमा जान समेत कार्यक्रममा सुझाव दिईएको थियो । सन् २०५० भित्र क्षयरोगविहिन विश्व बनाउने विश्व स्वास्थ्य संगठनको लक्ष्य अनुसार नेपालमा पनि निःशुल्क रुपमा क्षयरोगको उपचार भईरहेको छ । 
कार्यक्रममा ५ जना क्षयरोगीलाई पोषण खर्चबापत जनही ४ हजार रुपैँया उपलव्ध गराईएको थियो । कार्यक्रम जिल्ला स्वास्थ्य कार्यालय मकवानपुरमा प्रमुख रामचन्द्र पाठकको अध्यक्षतामा भएको थियो ।