अशोक सामुदायिक वनमा सालक सम्बन्धी अन्तरक्रिया

४ चैत्र, हेटौंडा । हेटौंडा–१७ राजदेवीमा रहेको अशोक सामुदायिक वन उपभोक्ता समूहमा मंगलवार सालक संरक्षण सम्वन्धी अन्तरक्रिया कार्यक्रम भएको छ । राष्ट्रिय प्रकृति संरक्षण कोष, सौराहा चितवनको आर्थिक सहयोगमा कार्यक्रम भएको हो ।
कार्यक्रममा विश्वमा नै लोपोन्मुख एवम संरक्षित सूचीमा रहेको सालकको संरक्षण गर्नु पर्नेमा सहभागीहरुले जोड दिएका थिए । कार्यक्रममा सव डिभिजन वन कार्यालय हर्नामाडीका अधिकृत दीपकप्रसाद पुडासैनी, संचारकर्मी भीमसेन पौडेल र रुपेश दुलालले सहजीकरण गरेका थिए । अन्तरक्रियामा सालकको संरक्षण, यसको बासस्थान, आहार, कानूनी व्यवस्था, जनचेतना, प्रचारप्रसार लगायतका विषयहरुमा छलफल गरिएको थियो ।
हेटौडा–१७ का वडा सदस्य भीमप्रसाद अधिकारीको प्रमुख आतिथ्यता एवम समूहका अध्यक्ष बलराम अधिकारीको सभाध्यक्षतामा कार्यक्रम भएको थियो । कार्यक्रममा समूहका उपाध्यक्ष अर्जुनप्रसाद घिमिरे, सचिव उर्मिला पुलामी, राजदेवी माविका प्रअ. सानुकाजी पाण्डे, सल्लाहकार कृष्णप्रसाद नेपाल लगायतले मन्तव्य व्यक्त गरेका थिए ।
कार्यक्रममा समूहको कार्यसमिति, लेखा समिति, वनका कर्मचारी, उपभोक्ता लगायतको सहभागिता रहेको थियो ।