निर्वाचनका लागि मधेशी मोर्चासँग सहमति हुन्छ : थापा

१३ चैत, हेटौडा । उपप्रधानमन्त्री कमल थापाले आन्दोलनरत मधेशी मोर्चासँग छिट्टै सहमति हुने दावि गरेका छन् । मकवानपुर उद्योग बाणिज्य संघले हेटौडामा आइतबार गरेको सम्मान कार्यक्रममा बोल्दै थापाले सरकारले घोषणा गरेको स्थानीय तहको निर्वाचन सफल बनाउन मधेशी मोर्चासँग सहमति हुने दावि गरेका हुन् । 
उनले प्रधानमन्त्री पुष्पकमल दाहाल चीन जान अघि भएको छलफल सहमति नजिक पुगेको भन्दै चीनबाट फर्किएपछि लिखित सहमति हुने बताए । सबैलाई चुनावमा भाग लिने अवस्था सिर्जना गर्नेतर्फ सरकार प्रयासरत रहेको उनको भनाई छ ।
तराईमा अतिवादी शक्तिहरु सक्रिय रहेको बताउँदै उनले मधेशी मोर्चालाई पनि मूलधारबाहिर राखे अतिवादीहरुलाई नै फाइदा पुग्ने बताए । सरकार केही लचक भएर मधेशीमोर्चासँग सहमतिका लागि सबैपक्षसँग आग्रह गरिरहेको उनको भनाई छ । कार्यक्रममा मकवानपुर उद्योग बाणिज्य संघका अध्यक्ष राजकुमार न्यौपानेले हेटौडाको २५ मिटर सडक विस्तारबारे ध्यानाकर्षण गराएका थिए ।
यसअघि, जिल्ला समन्वय समिति मकवानपुरले गरेको अन्तरक्रिया कार्यक्रममा संघिय मामिला तथा स्थानीय विकास मन्त्री समेत रहेका थापाले स्थानीय तह विगतको जस्तो नभई अधिकार सम्पन्न हुने भएकाले स्थानीय तहको निर्वाचन सफल बनाउन सबैको सहयोग आवश्यक रहेको बताए । कार्यक्रममा मकवानपुरका प्रमुख जिल्ला अधिकारी नारायण शर्मा दुवाडी, स्थानीय विकास अधिकारी नारायण मैनाली लगायतले मन्तव्य व्यक्त गरेका थिए ।