३ सय १२ लाभग्राहीलाई दोस्रो किस्ता सिफारिस

१५ चैत, हेटौँडा । भुकम्प पुर्ननिर्माण आयोजना जिल्ला आयोजना कार्यान्वयन इकाईले अनुदानको दोस्रो किस्ता भुक्तानीका लागि मकवानपुरका ३ सय १२ भुकम्प प्रभावित लाभग्राहीको नाम सिफारिस गरेको छ । 
शहरी विकास मन्त्रालय अन्तरगतको आयोजनाले प्रक्रिया अनुसार जगसम्मको काम सम्पन्न गरेका बाग्मति, बकैया, मकवानपुरगढी, भीमफेदी र राक्सिराङ गाउँपालिकाका साथै थाहा नगरपालिकाका ३ सय १२ लाभग्राहीलाई दोस्रो किस्ता सिफारिस गरेको हो । दोस्रो किस्ताका लागि निवेदन दिएका लाभग्राहीमध्ये अनुगमनमा प्रक्रिया पुगेका ३ सय १२ लाई सोमबारसम्ममा सिफारिस गरेको इन्जिनियर रविन पाठकले बताए । 
आयोजनाका अनुसार बाग्मति गाउँपालिकाको बेतिनीमा एक, बकैयाको शिखरपुरका १८, मकवानपुरगढी गाउँपालिकाको बुढिचौरका ४८, भीमफेदी गाउँपालिकाको भैंसेका ४२, नामटारका ५, भीमफेदीका १०, कोगटेका ५५ लाभग्राही दोस्रो किस्ताका लागि सिफारिसमा परेका छन् । त्यस्तै, राक्सिराङ गाउँपालिकाको काँकडाका ९५, सरिखेतका ११ र थाहा नगरपालिकाको आग्राका २७ लाभग्राहीलाई दोस्रो किस्ताका लागि जिल्ला समन्वय समितिमा सिफारिस गरिएको इकाईले जनाएको छ । त्यसैगरी, गैरसरकारी कार्यालयमार्फत पुर्ननिर्माणको काम गरिरहेका कैलाश गाउँपालिकाको गोगनेका ३८ लाभग्राहीका लागि पनि दोस्रो किस्ता सिफारिस गरिएको छ । 
आयोजनाका अनुसार मकवानपुरमा ३० हजार २ सय ३८ भुकम्प प्रभावित रहेकोमा २० हजार ३ सय ५ जनाले अनुदान सम्झौता गरेका छन् । अनुदान सम्झौता गरेका १९ हजार ९ ले प्रथम किस्ता लगेका छन् । जिल्लामा २६ हजार ९ सय ९ वटा गुनासो दर्ता भएका छन् ।