बकैयामा सेनासहित लकडाउन प्रभावकारी बनाउन खटिए अध्यक्ष खनाल

१५ चैत, हेटौंडा । पूर्वी मकवानपुरको बकैया गाउँपालिकाले शनिबारबाट लकडाउन थप प्रभावकारी बनाउन कडाई गर्न थालेको छ । लकडाउन थप प्रभावकारी बनाउन गाउँपालिकाले शनिबार विहानैदेखि स्थानीयलाई आग्रह गर्दै मूख्य नाका व्यवस्थित गर्न थालेको हो ।
गाउँपालिकाका अध्यक्ष दामोदर खनाल, नेपाली सेना विकास निर्माण गण राजदमार बेसक्याम्पका मेयर पुरुषोतम कार्की, वडा अध्यक्ष शेरमान घलान, प्रहरीसहितको टोलीले श्रीपुर, हात्तिसुडे लगायतका क्षेत्रमा स्थानीयहरुलाई लकडाउन पूर्ण कार्यान्वयन गर्न आग्रह गर्दै घरदैलो समेत गरेका छन् । बकैया गाउँपालिकाले अनावश्यक आवतजावत रोक्नका लागि शनिबार विहानदेखि गाउँपालिकाको ४ वटा नाकामा नेपाली सेना, प्रहरी, जनप्रतिनिधिसहितको संयुक्त टोली परिचालन शुरु गरेको छ । 
गाउँपालिका अध्यक्ष खनालका अनुसार पूर्वमा भुवनचुली, पश्चिममा श्रीपुर, उत्तरमा ठिंगन र दक्षिणमा मोहरी नाकामा प्रवेशलाई कडाई गर्न लगत तयार गर्ने काम शुरु भएको छ । अनावश्यक आवतजावतले संक्रमणको जोखिम बढ्ने भएकाले यस्तो सावधानी अपनाईएको उनको भनाई छ । शनिबार नै गाउँपालिकाको १२ वटै वडामा जनप्रतिनिधिसहित स्वयंसेविका र स्वास्थ्यकर्मीहरुले विदेशबाट फर्किएकाहरुको लगत संकलन र स्वास्थ्य अवस्था बुझ्ने उनले बताए ।