निकुञ्जको गोली हानाहानमा मृत्यु हुने पदमपोखरीका मोक्तान

सांकेतिक तस्विर

१५ चैत, हेटौंडा । पर्सा राष्ट्रिय निकुञ्जमा शुक्रबार विहान भएको गोली हानाहानमा मृत्यु हुने मकवानपुरको पदमपोखरीका रहेको खुलेको छ । 

शुक्रबार निकुञ्जनमा रहेका समुह र निकुञ्च सुरक्षाका लागि खटिएको नेपाली सेनाको टोलीबिच गोली हानाहान हुँदा मकवानपुरको पदमपोखरीका भिमलाल मोक्तनको मृत्यु भएको निकुञ्जका प्रमुख संरक्षण अधिकृत अमिर महर्जनले जानकारी दिए । निकुञ्जको  ‘कोर’ क्षेत्रमा रहेका ११ जनाको समूहले सुरक्षाकर्मीमाथि फायरिङ गरेपछि नेपाली सेनाको जवाफी फायरिङमा मोक्तानको मृत्यु भएको महर्जनको दावि छ । 

टोलीले पदमपोखरीकै मोहनसिंह दोङलाई पक्राउ गरेको छ । घटनास्थलबाट २ थान बन्दुकसहित बन्दोबस्तीका सामान बरामद भएको जनाईएको छ । घटनामा नेपाली सेनाका जमदार मिनबहादुर छन्त्याल घाइते भएका हुन् । उनको जीतपुरस्थित नेपाली सेनाको नम्बर २८ बाहिनि अड्डामा उपचार भईरहेको छ । घटनाबारे थप अनुसन्धान अघि बढाएको निकुञ्ज कार्यालयले जनाएको छ ।

मृतकको शव नारायणी उपक्षेत्रीय अस्पतालमा रहेको बताउँदै पर्साका प्रहरी उपरीक्षक गंगा पन्तले मृतकका परिवार पर्सा प्रहरीको सम्पर्कमा पुगेको प्रष्टखबरलाई बताईन् । उनले पोष्टमार्टमबारे छलफल भईरहेको बताईन् ।