तरुण दल हेटौँडा–६ ले दौड प्रतियोगिता गर्ने

१९ चैत, हेटौँडा । नेपाल तरुण दल हेटौँडा ६ नम्बर वडा इकाई समितिले नयाँ बर्षको उपलक्ष्यमा बैशाख १ गते खुल्ला दौड प्रतियोगिता गर्ने भएको छ । तरुण दलले बर्षेनी गर्दै आएको दौड प्रतियोगिता, शुभकामना अदानप्रदान एवं चियापान कार्यक्रमलाई यसबर्ष पनि निरन्तरता दिन लागेको हो । 

इकाई समितिको शनिबार बसेको बैठकले दौड प्रतियोगिता र शुभकामना एवं चियापान कार्यक्रमलाई व्यवस्थित गर्न उपसमितिहरु गठन गरेको छ । बैठकले कमल कोइरालाको संयोजकत्वमा आर्थिक उपसमिति, दिनेश ढकालको संयोजकत्वमा स्वयमसेवक परिचालन उपसमिति, दामोदर धिताल संयोजकत्वमा स्वागत सत्कार उपसमिति र प्रेस युनियन मकवानपुरका अध्यक्ष रुपेश दुलालको संयोजकत्वमा प्रचारप्रसार उपसमिति गठन गरेको छ ।

दौड प्रतियोगितामा भाग लिन इच्छुक व्यक्तिले हेटौंडा–४ स्कुलरोडमा भएको पाण्डे इन्टरप्राईजेज, कान्तिरापथमा रहेको सापकोटा हार्डवेयर, ६ नम्वर वडा अध्यक्ष राजनकुमार बास्तोला र ग्यालरी सीमा मार्केटमा फारम भर्ने सक्ने जनाईएको छ । तरुण दल ६ नम्वर वडा अध्यक्ष राजकुमार बास्तोलाको अध्यक्षतामा भएको कार्यक्रममा नेपाली काँग्रेस ६ नम्बर इकाई सभापति रामहरी तिमल्सिना, तरुण दल क्षेत्रीय उपाध्यक्ष विक्रम दंगाल लगायत पार्टी र तरुण दलका नेता कार्यकर्ताको सहभागिता रहेको थियो ।