यसकारण भयो पदमपोखरीमा हवाई फायर

सांकेतिक तस्विर

१६ चैत, हेटौंडा । मकवानपुरको हेटौंडा-१३ पदमपोखरीमा शनिबार राति प्रहरीले हवाई फायर गरेको छ । 
दुई टोलका युवाहरुबीच भएको विवाद मिलाउने क्रममा अनियन्त्रिण भिड नियन्त्रण गर्न प्रहरीले ३ राउण्ड हवाई फायर गरेको मकवानपुरका प्रहरी उपरीक्षक सुशिलसिंह राठौरले जानकारी दिए । प्रहरीका अनुसार शनिबार राति स्थानीय मिलन टोलका युवा र सांगे चोकका स्थानीयबीच विवाद भएको हो । मादक पदार्थ सेवन गरी सांगेचोक पुगेका युवाहरुलाई होहल्ला नगर्न भनेपछि विवाद शुरु भएको स्थानीयले बताएका छन् । 
दुई समूहबीच विवाद भएपछि इलाका प्रहरी कार्यालय पदमपोखरीबाट प्रहरी नायव निरीक्षकसहितको टोली घटनास्थलमा पुगेर सम्झाउने क्रममा स्थिति अनियन्त्रित भएपछि पदमपोखरीको टोलीले एक राउण्ड हवाई फायर गरेको थियो । 
थप मद्धतका लागि गएको इलाका प्रहरी कार्यालय पशुपतिनगरको टोलीले पनि स्थानीयको विवाद समाधान गर्न कोशिश गरेपनि प्रहरीमाथि नै ढुंगा प्रहार भएको प्रहरीले जनाएको छ । प्रहरी निरीक्षक अरुणकुमार कुसवाहसहितको टोलीले विवाद गर्ने युवाहरुलाई नियन्त्रणमा लिने क्रममा ढुंगा प्रहार भएपछि प्रहरीले थप २ राउण्ड हवाई फायर गरेको प्रहरी उपरीक्षक राठौरले जानकारी दिए । 
घटनामा प्रहरी भ्यानमा क्षति पुगेको छ र प्रहरीका एक हवल्दार घाइते भएका छन् । प्रहरीले २० बर्षीय रोशन बललाई नियन्त्रणमा लिएको छ । लकडाउनकै समयमा भएको घटनाबारे अनुसन्धान अघि बढाएको प्रहरी उपरीक्षक राठौंरले जानकारी दिए ।

यो पनि पढ्नुस्
हेटौंडाको पदमपोखरीमा‌ गोलि चल्यो