वडा सदस्य बास्तोलाद्वारा राहतलाई २५ हजार सहयोग

१९ चैत, हेटौंडा । हेटौंडा वडा नम्बर ६ का वडा सदस्य राजकुमार बास्तोलाले वडामा राहत वितरणका लागि २५ हजार रुपैंया सहयोग गर्ने भएका छन् । उनले वडाका दैनिक ज्यालामा काम गरी छाक टार्नुपर्ने श्रमिक र अति विपन्न परिवारका लागि राहत वितरण गर्न व्यक्तिगत रुपमा २५ हजार रुपैंया सहयोग गर्ने जनाएका हुन् । 
उनले भने–‘जनप्रतिनिधि भनेकै समस्या परेको अवस्थामा सहयोग गर्न जनताले निर्वाचित गरेका हुन्, व्यक्तिगत लगानी गरेरै भएपनि राहत पुर्याउँछौं ।’ वडाका २३ वटा टोलविकास संस्थाहरुले टोल विकास वडा समन्वय समितिमार्फत आफ्नो क्षेत्रमा रहेका दैनिक ज्यालादारी श्रमिक र विपन्न परिवारको तथ्यांक बुझाएको बताउँदै बास्तोलाले त्यही तथ्यांकका आधारमा राहत बाँड्ने काम शुरु भएको बताए । थप राहतका लागि प्याकिङको काम थाल्न एक पसललाई जिम्मा दिईसकेको उनले बताए ।
वडा अध्यक्ष अर्जुनप्रसाद चौलागाईले पनि व्यक्तिगत र दाताहरुबाट प्राप्त सहयोग जुटाएर वडामा ज्यालाबाट छाक टानुपर्ने श्रमिक र विपन्न परिवारले भोकै बस्नु नपर्ने अवस्था सिर्जना गर्ने बताएका छन् । सोमबार नेपाली कांग्रेसको समन्वयमा चुच्चेखोला र रामनगरका गरी ३४ परिवारलाई राहत वितरण गरिएको थियो भने मंगलबार हेटौंडा-१० टिसिएनस्थित माछभात खाना पसलका संचालक राजकुमार महतोको सहयोगमा पुतलीबजार, लाहुरेटोल र चौघडामा गरी २० परिवारलाई राहत वितरण गरिएको थियो ।