कोभिड–१९ को परीक्षण विहीबारदेखी हेटौंडाबाटै हुने

१९ चैत्र, हेटौंडा । कोरोना भाइरस अर्थात कोभिड १९ को परीक्षण भोली विहीबारबाट बागमती प्रदेशको राजधानी हेटौंडाबाट पनि हुनेभएको छ । 
दक्षिण एसियामै पहिलोपटक हेटौंडा–१० मा स्थापित कीटजन्य रोग अनुसन्धान तथा तालीम केन्द्र को प्रयोगशालाबाट कोभिड–१९ को परीक्षण सुरु हुने भएको हो ।
प्रदेशको राजधानी हेटौंडामा रहेको कीटजन्य रोग अनुसन्धान तथा तालिम केन्द्रबाट कोभिड–१९ को परीक्षण गर्ने कार्यको तयारी पुरा भएको बागमती प्रदेशको सामाजिक विकास मन्त्रालयका प्रवक्ता दीपेन्द्र सुबेदीले जानकारी दिए ।
ल्याबका आवश्यक सबै सामग्री र जनशक्ति हेटौंडा आइपुगेकोले २० गते विहान १० बजेदेखि नियमितरुपमा परीक्षण गरिने प्रवक्ता सुवेदीको भनाई छ । 
सरकारले प्रयोगशालाका लागि विज्ञका रुपमा विष्णु उपाध्याय र निर्मल आचार्यलाई खटाएको छ । 
छमेकी प्रदेश नम्बर–२ का विभिन्न जिल्लालाई समेत पायक पर्ने गरी हेटौंडामा प्रयोगशाला सञ्चालन गर्न तयारी भएको हो । 
पर्याप्तरुपमा परीक्षण गर्न पोलिमर चेन रियाक्सन मेसिन थप गरिने भएको छ । ब्याक्टेरिया, प्यारासाइटहरुका प्रजाति अध्ययन गर्न, भाइरसको स्वरुप परिवर्तनबारे बुझ्न हेटौंडामा स्थापित आधुनिक पोलिमर चेन रियाक्सन ल्याबलाई अब पूर्णक्षमतामा प्रयोगमा ल्याउन लागिएको हो । 
उपकरण, केमिकल र जनशक्ति व्यबस्थापन हुन नसक्दा ल्याब पूर्ण प्रयोगमा ल्याउन सकिएको थिएन । आवश्यक उपकरण हेटौंडामा भएर पनि कोरोना भाइरसको आशंका भए परीक्षणका लागि नमूना काठमाडौं नै पठाउनुपर्ने बाध्यता रहँदै आएको थियो ।