सुनगाभाका प्रिन्सिपल पराजुलीबाट राहतका लागि सहयोग

२० चैत, हेटौंडा । हेटौंडा-६ चौघडामा रहेको सुनगाभा शिक्षा निकेतनका प्रिन्सिपल हेटौंडा–५ का अरुणकुमार पराजुलीले राहत वितरणका लागि १० हजार रुपैंया सहयोग गर्ने जनाएका छन् । उनले हेटौंडा वडा नम्बर ६ मा भईरहेको राहत वितरणमा आफुले पनि सहयोग गर्ने जनाएका हुन् । 
आफ्नो कार्यक्षेत्र त्यही भएकाले आफुले व्यक्तिगत रुपमा सहयोग गर्ने वडा सदस्य राजुकुमार बास्तोलालाई जानकारी दिएका छन् । ‘मेरो कार्यक्षेत्रमा समस्यामा परेकाहरुलाई राहत वितरणको काम थालेको थाहा पाएँ ।’उनले भने–‘सो अभियानमा सघाउन मैले १० हजार रुपैंया सहयोग गर्छु ।’ पराजुलीको सहयोगले वडामा भईरहेको राहत वितरण कार्यक्रममा टेवा पुग्ने वडा अध्यक्ष अर्जुनप्रसाद चौलागाईले बताए । ‘वडामा दैनिक ज्यालादारी गरी जीवन गुजारा गर्ने र विपन्न परिवारलाई राहत वितरणको काम गरिरहेको छु’–वडा अध्यक्ष चौलागाईले भने–‘अरुण सरको सहयोगले यसमा मद्धत गर्छ, यस्तै अन्य सहयोगी दातालाई पनि म सहयोगका लागि आग्रह गर्छु ।’ 
वडा अध्यक्ष चौलागाई र वडा सदस्य बास्तोलाले आफ्नो व्यक्तिगत खर्च जुटाउँदै, दाताहरुबाट प्राप्त सहयोग पनि सदुपयोग गर्दै टोल विकास संस्थाहरुले उपलव्ध गराएको विवरण अनुसार राहत वितरणको काम गरिरहेका छन् । अहिलेसम्म वडाका १ सय ५४ परिवारलाई राहत वितरण भईसकेको छ । विहिबार पनि राहत वितरण गर्ने अध्यक्ष चौलागाईले बताए ।