हेटौंडामा विहिबारदेखि 'कोरोना प्रयोगशाला' संचालन, यसरी हुँदैछ परीक्षण

२० चैत, हेटौंडा । बागमती प्रदेशको राजधानी हेटौंडामा विहिबारबाट कोराना (कोभिड–१९) को नमूना परीक्षण गर्ने प्रयोगशाला संचालनमा आएको छ । हेटौंडा–१० मा रहेको किटजन्य रोग अनुसन्धान तथा तालिम केन्द्रमा ५ बर्ष अघिदेखि थन्किएर रहेको पिसिआर मेसिन कोभिड–१९ भाईरस परीक्षणका लागि प्रयोगमा ल्याईएको हो ।
तालिम केन्द्रमा रहेको प्रयोगशालामा मेसिन रहेपनि जनशक्ति र सामग्रीको अभावका कारण प्रयोगमा आएको थिएन । संघीय र प्रदेश सरकारको प्रयासमा जनशक्ति र सामग्री उपलव्ध भए पछि कोभिड–१९ परीक्षण प्रयोगशाला संचालनमा आएको छ । प्रयोगशाला संचालनका लागि प्रदेश जनस्वास्थ्य प्रयोगशालाका निमित निर्देशक नारायणबहादुर कार्कीको नेतृत्वमा ५ जनाको टोली परिचालन गरिएको बागमती प्रदेश सामाजिक विकास मन्त्रालयका प्रवक्ता दिपेन्द्र सुवेदीले बताए । ‘संघीय र प्रदेश सरकारको प्रयासमा विहिबारबाट प्रयोगशाला संचालनमा आएको छ’–उनले भने–‘अब हेटौंडाबाटै कोरोना छ÷छैन भन्ने रिपोर्ट आउँछ ।’
प्रयोगशालाले एकपटकमा ६० जनाको स्वाब (खकार) नमूना परीक्षण गर्ने जनाईएको छ । पहिलो चरणमा ३ सय ७५ नमूना परीक्षणका लागि किट मौज्दात रहेको छ । प्रयोगशाला संचालनमा आएपछि बागमती प्रदेशको मकवानपुर र सिन्धुलीका साथै प्रदेश २ का विभिन्न जिल्लाबाट आएको नमूना परीक्षण गरिने भएको छ ।