प्रहरी कार्यालयमा ‘डिस्इन्फेक्सन’ गर्ने कार्य शुरु

२१ चैत, हेटौंडा । बागमती प्रदेश प्रहरी कार्यालयले आफ्ना कार्यालयहरुमा डिस्इन्फेक्सन गर्ने काम शुरु गरेको छ । कोरोनाको संक्रमण रोक्नका लागि प्रहरी कार्यालयहरुमा डिस्इन्फेक्सन गर्ने कार्य शुरु भएको हो । 
प्रदेश प्रहरी कार्यालयका निमित्त प्रमुख प्रहरी बरिष्ठ उपरीक्षक किशोरकुमार दाहालले यसको शुभारम्भ गरेका छन् । शुभारम्भ कार्यक्रममा बागमती प्रदेश प्रहरी कार्यालयका सवारी साधन र आफ्नो कार्यालय परिसर र आसपासमा डिस्इन्फेक्सन गरिएको थियो । प्रहरी बरिष्ठ उपरीक्षक दाहालले कोरोनाको संक्रमण रोक्नका लागि आचारण र व्यवहारमा सुधार ल्याउनुपर्नेमा जोड दिए । उनले कामको सिलसिलामा धेरै मानिसहरुसँग सम्पर्क हुन सक्ने हुँदा साबुन, सेनेटाईजर, मास्क, पन्जा लगायतका सामाग्रीको सहायताले सुरक्षित रही आफ्नो कार्यक्षेत्रमा खटिन निर्देशन दिए । उनले सरकारले घोषणा गरेको लकडाउनको राम्रोसँग पालना गर्न, घरबाहिर जानैपर्ने काममा बाहेक ननिस्कन, हात मिलाउने तथा अंकमाल नगरी टाढैबाट नमस्कार गर्न,  सामाजिक दुरी कायम गर्न,  बारम्बार साबुन पानी वा सेनेटाईजरले हात सफा गर्न, सरसफाईमा विशेष ध्यान दिन, खोक्दा र हाछिउँ गर्दा नाक र मुख छोपेर मात्र गर्न, मुख, नाक र आँखामा हात लैलानु अगाडि वा खानेकुरा छुदा वा खाँदा २/३ पटक सोचेर मात्र हात सफा भए नभएको एकिन गरी गर्न र हातमा घडि, चुरा, डोरो आदि बाँधेको भए पनि अहिलेलाई नलगाउने जस्ता सामान्य कुराहरुमा विशेष ध्यान दिन समेत प्रहरी रसर्वसाधरणलाई आग्रह गरेको कार्यालयका सूचना अधिकृत प्रहरी उपरीक्षक अरुण पौडेलले जानकारी दिए ।