बालजागृतिबाट ७ शिक्षकलाई विदाई

२२ चैत, हेटौँडा । हेटौँडा–६ गौरीटारमा रहेको बालजागृति युवा बर्ष माविबाट ७ जना शिक्षकलाई विदाई गरिएको छ । विद्यालयले मंगलबार विदाई तथा शुभकामना अदानप्रदान कार्यक्रमको आयोजना गरी सेवा निवृत्त, शिक्षक सेवा आयोगमा नाम निकालेका, सरुवा भई अन्यत्र गएका र विदेश जान लागेका गरी ७ जना शिक्षकलाई सम्मानसहित विदाई गरेको हो ।
विद्यालयले शिक्षक रामकुमार अधिकारी, कृष्णप्रसाद दाहाल, भरत मैनाली, दिपक ढकाल, राजेन्द्र थापा, किशोर न्यौपाने र चन्द्रप्रसाद खतिवडालाई दोसल्ला र ढाकाटोपीसहित सम्मान गरेको थियो । कार्यक्रममा शिक्षकहरुले बालजागृतिमा आफुहरुको सेवाका क्रममा प्रगाढ सम्बन्ध बनेको भन्दै यसलाई निरन्तरता दिने प्रतिवद्धता जनाए । विद्यालयको उन्नति, प्रगतिमा आफ्नो सहयोग सधैं रहने समेत उनीहरुको भनाई थियो । 
विद्यालय व्यवस्थापन समितिका ज्येष्ठ सदस्य ईन्द्रमणी गौतमको अध्यक्षतामा भएको कार्यक्रममा विदाई भएका शिक्षकहरु रामकुमार अधिकारी, दिपक ढकाल, विद्यालयका प्रधानाध्यापक अर्जुनप्रसाद चौलागाई, सहायक प्रधानाध्यापक शिव दुलाल, शिक्षक प्रतिनिधि भरत सापकोटा लगायतले मन्तव्य व्यक्त गरेका थिए । 
शिक्षक र विद्यालय व्यवस्थापन समितिका पदाधिकारीहरुको सहभागिता रहेको कार्यक्रममा नयाँ बर्ष २०७४ को शुभकामना समेत आदानप्रदान गरिएको थियो ।
तस्विर सौं. भरत सापकोटा