कोरोना संक्रमितको संख्या बढेको छैनः प्रवक्ता देवकोटा

२१ चैत्र, हेटौंडा । स्वास्थ्य तथा जनसंख्या मन्त्रालयले कोरोना संक्रमितको संख्या नबढेको स्पष्ट पारेको छ । 
शुक्रबार मन्त्रालयमा आयोजित नियमित पत्रकार सम्मेलनमा प्रवक्ता डाक्टर विकास देवकोटाले संक्रमितको संख्या बढेको भन्ने समाचारको खण्डन गर्दै संक्रमितको संख्या यथावत रहेको पुष्टि गरेका हुन् ।
विभिन्न संञ्चारमाध्यममा पोखरामा कोरोना भाइरसको पोजेटिभ देखिएको भनी समाचार आएको उल्लेख गर्देै उनले निको भएको सहित गरेर जम्मा ६ वटा केस मात्रै पोजेटिभ भएको स्पष्ट पारेका हुन् ।
प्रदेशका विभिन्न स्थानमा नमुना परीक्षणका लागि नया मेसिनहरु राखिएकाले कुनै संकास्पद केश भएमा त्यसको पुन परीक्षण गरेपछि मात्रै निष्कर्षमा पुग्न सकिने प्रवक्ता देवकोटाले बताए ।
प्रवक्ता डाक्टर देवकोटाले पत्रकार सम्मेलनमा दिईएको जानकारी अनुसार, अहिले सम्म राष्ट्रिय जनस्वास्थ्य प्रयोगशाला टेकूमा अहिले सम्म जम्मा १ हजार २ सय ७७ वटा नमुना परीक्षण भएको छ । 
प्रतिदिन सय भन्दा बढीका दरले टेकूमा नमुना परीक्षण गर्न थालिएको छ भने काठमाण्डौ बाहिर ७८ वटा नमुना परीक्षण गरिएको छ । 
काठमाडौं बाहिर धरानमा ३९, जनकपुरमा ५, हेटौडामा ५, पोखरामा १९, सुर्खेतमा ७ र धनगढीमा ४ वटा नमुना परीक्षण गरिएको हो । 
सबै परीक्षण नेगेटिभ आएको बताउँदै प्रवक्ता देवकोटाले बुटबलमा भने नमुना परीक्षणका लागि मेसिन जडान कार्य सुरु भईरहेको जानकारी दिए ।
प्रवक्ता देवकोटाका अनुसार भक्तपुरको खरिपाटी क्वारेन्टाईनमा रहेका सबै ९६ जना तथा कैलाली र कञ्चनपुरका क्वारेन्टाईनमा रहेका ९२ जनाको नमुना संकलन गरिएको छ । 
यसैगरी कोभिड १९ को संभावित संक्रमणको आंशकामा उपत्यकामा १५  र उपत्यका बाहिर १०५ गरी मुलुकभर १ सय २० जना आइसोलेसनमा उपचारत छन् ।