मकवानपुरमा ३० सामुदायिक वनले भवन उपलव्ध गराउने

२२ चैत, हेटौंडा । मकवानपुरका ३० वटा सामुदायिक वन समूहले आफ्नो भवन कोरोनाविरुद्धको अभियानका लागि उपलव्ध गराउने भएका छन् । विभिन्न क्षेत्रका सामुदायिक वनले आवश्यक पर्दा आईसोलेसन र क्वारेन्टाईनका लागि आफ्नो भवन उपलव्ध गराउने भएका हुन् । 

‘भवन भएका ३० सामुदायिक वनले कोरोना विरुद्धको अभियानका लागि भवन उपलव्ध गराउने भएका छन् ।’–सामुदायिक वन उपभोक्ता महासंघ मकवानपुरका अध्यक्ष साधुराम चौलागाई भने । उनका अनुसार जिल्लाका भवन उपलव्ध गराउने सामुदायिक वनको सम्पूर्ण विवरण सामुदायिक वन उपभोक्ता महासंघ केन्द्रीय कार्यालयलाई उपलव्ध गराईसकिएको छ । सामुदायिक वन समूह समुदायमा आधिरित संस्था भएकाले विपदको अवस्थामा राज्यलाई सहयोग गर्ने निर्णय भएको चौलागाईले बताए ।

‘तत्काल जम्मा भएर बैठक गर्ने अवस्था त छैन तर हामीले सामाजिक सञ्जालको प्रयोग र टेलिफोनमार्फत छलफल गरेर आवश्यक पर्दा फेकोफन सरकारलाई सहयोग गर्न तयार रहेको निर्णय गरेका छौं ।’–उनले भने । मकवानपुरमा हाल ४ सय बढि सामुदायिक वन समूह छन् ।

रानीले गर्यो भवन दिने घोषणा
हेटौंडा–६ चौघडामा रहेको रानी सामुदायिक वन उपभोक्ता समूहले आफ्नो भवन कोरोना विरुद्धको अभियानका लागि दिने घोषणा गरेको छ । समूहका अध्यक्ष कृष्ण विडारीले आवश्यक परेर राज्यले माग्दा वन समूहको भवन उपलव्ध गराउने निर्णय भएको बताए । इन्टरनेट, विद्युत, खानेपानी लगायतका सबै सुविधा भएकाले आईसोलेसन र क्वारेन्टान बनाउनु परे सहजै बनाउन सकिने उनले बताए । यो समूह देशकै चर्चित सामुदायिक वन हो ।