नेपालमा कोरोना संक्रमितको संख्या ९ पुग्योः स्वास्थ्य मन्त्रालय

२२ चैत्र, हेटौंडा । विश्वभरी महामारीको रुपमा फैलिएको कोरोना भाइरसको संक्रमण नेपालमा कोरोना स्थानीयमा पनि फैलिएको छ । 
शनिबार स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डाक्टर विकास देवकोटाले नेपालमा थप ३ जनामा कोरोना संक्रमण पोजेटिभ दिएको र पहिलो पटक कोरोना संक्रमण स्थानीयमा फैलिएको पुष्टि गरेका हुन् ।
यो विदेशबाट आएका नेपालीबाट स्थानीयमा सरेको पहिलो घटना हो । यसअघि विदेशबाट आएका मानिसमा मात्रै कोरोना संक्रमण देखिदै आएको थियो । 
प्रवक्ता देबकोटाले कैलाली र कञ्चनपुरको क्वारेन्टाईनमा बसेका ३४ बर्षिया महिला, २१ बर्षिय पुरुष, र ४१ बर्षिय पुरुषमा कोरोना पोजिटिभ देखिएको जानकारी दिए ।
प्रवक्ता देवकोटाका अनुसार नमुना परीक्षण पोजेटिभ देखिएपछि तीनै जनालाई धनगढीस्थित सेती प्रादेशिक अस्पतालमा लगिएको छ । दुवै पुरुष भारतबाट आएका हुन् । संक्रति महिला भने एकजना संक्रमितको परिवारको सदस्य भएको डाक्टर देवकोटाले बताए ।
उनले संक्रमित २ जना टेकू, २ जना बाग्लुङस्थित अस्पतालमा र ४ जना धनगढीस्थित सेती प्रादेशिक अस्पतालमा उपचाररत रहेको र सबैको स्वास्थ्य अवस्था सामान्य रहेको जानकारी दिए । 
यस्तै प्रवक्ता देवकोटाले स्थानीयमा संक्रमण फैलिएसंगै नेपाल कोरोना संक्रमण फैलावटको दोश्रो चरणमा प्रवेश गरेकाले विदेशबाट आएकाहरुलाई अनिवार्य रुपमा क्वारेन्टाईनमा बसिदिन अनुरोध गरेका छन् ।
यसअघि मन्त्रालयका विज्ञहरुले कोरोनाको स्थानीय संक्रमण नभएकाले विदेशबाट आएकालाई मात्रै क्वारेन्टाईनमा बस्नका लागि प्राथमिकता दिदै आएका थिए ।  
पत्रकार सम्मेलनमा दिईएको जानकारी अनुसार, सनिबारसम्म राष्ट्रिय जनस्वास्थ्य प्रयोगशालामा अहिले सम्म १ हजार ४ सय ४१ वटा नमुना परीक्षण भएको छ भने काठमाण्डौ उपत्यकामा १५ जना र काठमाण्डौ बाहिर ५४ गरी ६९ जना आइसोलेसन छन् ।
डाक्टर देवकोटाले नमुना परीक्षणको दायरा बढाईरहेको र अहिले काठमाण्डौ बाहिर जनकपुर, धरान, हेटौडा, पोखरा, धनगढी र सुर्खेतमा नमुना परीक्षण भईरहेको तथा  चितवन र बुटवलमा भोलीबाट सूरु गरिने जानकारी दिए ।