मकवानपुरमा शहरदेखि गाउँसम्म स्वास्थ्य जाँचको व्यवस्था

२३ चैत, हेटौंडा । सरकारले कोरोनाको संक्रमण रोक्नका लागि लकडाउनको घोषणा गरेको छ । यसले गर्दा ग्रामिण क्षेत्रबाट शहरमा आई स्वास्थ्य जाँचका लागि समस्या परिरहेको गुनासो आईरहँदा मकवानपुरमा भने शहरदेखि गाउँसम्मै स्वास्थ्य जाँचको व्यवस्था मिलाईएको छ ।
मकवानपुरका १० वटै स्थानीय तहले आफ्नो क्षेत्रमा रहेका स्वास्थ्य संस्थामा नियमित स्वास्थ्य जाँचको व्यवस्था मिलाएका हुन् । ग्रामिण भेगका स्वास्थ्य संस्थामा कम स्रोतसाधनको उपलव्धता भएपनि स्वास्थ्यकर्मीहरुले विरामीहरुलाई अहिले असहज परिस्थितिमा पनि निर्वाध सेवा दिईरहेका छन् । पूर्वी मकवानपुरको सिमानामा रहेको राईगाउँस्थित स्वास्थ्य संस्थाले लकडाउनपछि मकवानपुर प्रवेश गरेकाहरुको जाँचमा विशेष निगरानी गरिरहेको राईगाउँ स्वास्थ्य चौकीका प्रमुख फुलेश्वर पाण्डेले बताए ।
मकवानपुरका पश्चिमी क्षेत्रमा रहेको मनहरी प्राथमिक स्वास्थ्य केन्द्रले पनि यस क्षेत्रका विरामीलाई नियमित भन्दा अझ सावधानीका साथ सेवा दिईरहेको छ । केन्द्रले ‘ज्वरो क्लिनिक’ नै संचालन गरी ज्वरोका विरामीलाई छुट्टै जाँचको व्यवस्था मिलाएको छ । कोरोनाको त्रासका कारण अन्य रोगका विरामीलाई जाँचमा वेवास्ता भईरहेको खबर आईरहँदा मनहरीले सबैलाई समान ढंगले उपचार गरिरहेको मनहरी स्वास्थ्य केन्द्रका प्रमुख डा.शरदप्रसाद दाहालले बताए ।
बागमती प्रदेशको सदरमुकाम हेटौंडामा हेटौंडा अस्पतालले जिल्लाभरका विरामीलाई सेवा दिईरहेको छ । हेटौंडा–४ स्थित श्रमिक मावि कर्रामा आईसोलेशन वार्ड र हेटौंडा–१० स्थित हेटौंडा एकेडेमीमा क्वारेन्टाईन वार्ड स्थापना गरी सेवा दिईएको छ । यी दुई स्थानमा विरामीहरुको जाँच, नमूना संकलन गरी हेटौंडास्थित कोरोना जाँच प्रयोगशालामा पठाउने र परामर्श दिने काम भईरहेको आईसोलेसन वार्ड प्रमुख एवं जनस्वास्थ्य अधिकृत भोलाप्रसाद चौलागाईले बताए ।
मकवानपुरमा हालसम्म २१९ क्वारेन्टाईन बेड, ३४ आईसोलेसन बेड र ४ आईसियुको व्यवस्था गरिएको छ । सबै स्थानीय तहले विरामीहरुलाई गाउँमै उपचारमा सहजताका लागि स्वास्थ्यकर्मीहरुलाई प्रोत्साहन गरिरहेका छन् । जसले गर्दा कोरोना संक्रमणको जोखिमको अहिलेको अवस्थामा सामान्य विरामी पर्दा शहर पुग्नुपर्ने अवस्था हटेको छ ।