दुरी कायम नगरी तरकारी बजारमा भिड 

२३ चैत, हेटौंडा । लकडाउनको समयमा दैनिक उपभोग्य सामग्रीका खाद्यान्न पसल, तरकारी पसल मकवानपुरमा बिहान १० बजेदेखि ३ बजे सम्म खुल्ला गरिएको छ । उक्त समयमा मुख्य गरेर तरकारी पसलमा मानिसको भीड देखिने गरेको छ । 
तरकारी किन्न हेटौंडा–१० स्थित तरकारी बजार र हेटौंडा–४ स्थित ख्वपगल्लीमा भिड लाग्ने गर्दछ ।  लकडाउनका समयमा अत्यावश्यक काम बाहेक हिडडुल नगर्नु भनेपनि किनमेलको बहानामा सर्वसाधारण दिनभर बजार डुल्ने गरेका छन् । ‘अहिले आधा किलो गोलभेडा र एक किलो आलुको झोला मोटरसाइकलमा हालेर किनमेल भन्दै दिनभर घुम्ने बढेका छन् ।’–मेनरोडमा भेटिएका एक व्यापारीले भने । लकडाउन भन्नु भन्दा खुल्ला गर्दा नै उपयुक्त हुने उनको भनाई छ । बिहान १० बजे देखि ३ बजे सम्म प्रशासनले तरकारी किन्न र विक्री वितरण गर्न अनुमति दिएपछि यसअघि कडाई गर्ने गरेको प्रहरीलाई पनि समस्या परेको छ । 
‘लकडाउन भनेर हामी चैं हिडेर पुग्दा त कोहि कार लिएर त कोहि मोटरसाइकल लिएर तरकारी किन्न भिड लागेको पो देखियो ।’–एक उपभोक्ताले भने–‘यो लकडाउन चर्को स्वरमा बोल्न नसक्ने, श्रमिक र गरिबलाई मात्रै हो जस्तो छ ।’ तरकारी बजारमा भिड बढेको बारे प्रतिक्रिया माग्दा वडा प्रहरी कार्यालय हेटौडाका प्रहरी निरीक्षक ईश्वरी प्रसाद भण्डारीले दुरी कायम गरेर किनमेल गर्न घेराको व्यवस्था गरिएको र आग्रह समेत गरेको बताए । ‘प्रहरीले धेरै पटक अनुरोध गरेपनि सर्वसाधारणले उल्टै तरकारी किन्न पनि नपाउने भन्दै ठाडो जवाफ दिन्छन्, तै पनि दुरी कायम गराउने प्रयास गरिएको छ ।’
प्रहरीले तरकारी बजार प्रवेश गर्ने नाकामा सवारी प्रवेशमा कडाई गरेपनि हरेक व्यक्ति दैनिक वा दिनमा २ पटकसम्म तरकारी किनमेलको बहानामा बजार आउने गर्दा भिड बढेको छ ।