वडा सदस्य र टोल विकास अध्यक्ष सुरक्षाकर्मीलाई चिया खुवाउँदै

२५ चैत, हेटौंडा ।जनप्रतिनिधिले सामाजिक हितमा काम गरोस् भन्ने जनताको चाहना हुन्छ, त्यसकै लागि उनीहरुलाई जनताले जिताएर पठाउँछन् । उनीहरुको काम नै दुःख पिडामा मलम लगाउनु हो । विश्वव्यापी रूपमा फैलिरहेको कोरोना भाइरसको जोखिमलाई मध्यनजर गर्दै देश अहिले लकडाउनमा छ । 

लकडाउन प्रभावकारी बनाउन सबैले आफ्नो ढंगबाट सहयोग गरिरहेका छन् । हेटौंडाकी एक जनप्रतिनिधि १५ दिनदेखि निरन्तर सडकमा लकडाउन प्रभावकारी बनाउन खटिने सुरक्षाकर्मीलाई चिया खुवाउँदै आएकी छिन् । प्रष्टखबरकर्मी दिउँसो हेटौंडा १० स्थित बसपार्क क्षेत्रमा रिपोर्टिङका क्रममा पुग्दा हेटौंडा उपमहानगरपालिका वडा नम्बर १० की वडा सदस्य साधना श्रेष्ठ र हेटौंडा–१० स्थित आदर्श टोल विकास संस्थाकी अध्यक्ष शान्ता गजुरेल सुरक्षाकर्मीलाई चिया लिएर आउँदै गरेको भेटियो । ‘आज अलि ढिलो भयो, दुःख नमान्नु ल ?’–उनले बसपार्क क्षेत्रमा खटिएका सुरक्षाकर्मीलाई भनिन् । 

वडा सदस्य श्रेष्ठ र टोल विकास संस्थाकी अध्यक्ष गजुरेलले बसपार्क क्षेत्रमा खटिएका सुरक्षाकर्मीलाई चिया खुवाउदैको आएको बताए । ‘देश अहिले लकडाउनमा रहेको बेला सबैले आफ्नो क्षेत्रबाट सहयोग गर्नुपर्छ, त्यही भएर हामीले घर नजिक दिनभर घाममा खटिएर लकडाउन प्रभावकारी बनाउन खटिएका सुरक्षाकर्मीलाई चिया खुवाउँदै आएका छौं ।–उनीहरुले भने । वडा सदस्य श्रेष्ठले ड्युटीका कारण प्रहरीलाई खाजा खानेसमेत फुर्सद नहुने भन्दै तातो चिया भनेपनि पिउने व्यवस्था गरेको बताईन् । सुरक्षाकर्मीलाई थकान केही भने नि कम होस् भन्ने उद्धेश्यले चिया बनाएर ल्याउने गरेको आदर्श टोल विकास संस्थाकी अध्यक्ष गजुरेलले बताइन् ।

यस्तै, आफ्नो क्षेत्रमा रहेका सुरक्षाकर्मीलाई सामान्य सहयोग गर्न सके उनीहरुलाई केही राहत मिल्ने देखिन्छ । तर प्रहरीको माथिल्लो निकायबाट कसैबाट पनि सहयोग नलिन भनेका कारण प्रहरीहरु भने प्रचारको उद्धेश्य विना कसैले दिने पानी, चिया खान पनि डर मानिरहेका छन् ।