हेटौंडाबाट उद्धार गरी काठमाडौं पठाईएका बालकको निःशुल्क अपरेशन

२६ चैत, हेटौंडा । हेटौंडामा आर्थिक अभावका कारण अलपत्र परेपछि उद्धार गरी पठाईएका बालकको काठमाडौंमा सफल अपरेशन भएको छ । तिलगंगा आँखा अस्पताल काठमाडौंमा हेटौंडा–१७ राजदेवीका ६ बर्षीय सन्तोष कार्कीको सफल अपरेशन भएको हो । 
अस्पतालका डा. मिराज पोखरेल र डा. प्रकृति पोखरेलको टोलीले उनको मंगलबार सफल अपरेशन गरेको छ । अल्का अस्पतालका चिकित्सक युथ फर नेशन एवं युथ डक्टर्स एशोसियसनका आकस्मिक सहयोगतर्फका संयोजक डा.निकोलस भुसालको सहयोगमा उनको निःशुल्क अपरेशन भएको छ । सामुदायिक आँखा अस्पताल हेटौंडाका कार्यकारी अधिकृत सुधिर श्रेष्ठले निःशुल्क उपचारका लागि समन्वय गरिदिएका थिए । आर्थिक अवस्था कमजोर रहेका उनको उपचारका लागि हेटौंडा लेडि जेसीज २०२० की अध्यक्ष सुशिला पौडेलको पहलमा कर्मशिल समाज नेपालका अभियन्ता अर्जुनराज पौडेलले ३ हजार रुपैंया सहयोग गरेका थिए ।
दाजुभाइ खेल्ने क्रममा आँखामा चोट लागेर हेटौंडास्थित सामुदायिक आँखा अस्पताल ल्याईएकोमा तिलगंगा रिफर गरिएको थियो । तिलगंगा लैजान आर्थिक अभाव भएको जानकारी टिसिएन चोकमा ड्युटीमा रहेका प्रहरी सहायक निरीक्षक सुरेन्द्र हजरा र प्रहरी हवल्दार सिता खत्रीले रिपोर्टिङका क्रममा त्यहाँ पुगेका संचारकर्मी सुनिल शिवाकोटी र रुपेश दुलाललाई दिएकी थिईन् । उनीहरुले समाजसेवी विकेशलाल श्रेष्ठसंग आर्थिक सहयोगका लागि आग्रह गरेका थिए । बालकको उपचारका लागि श्रेष्ठबाट ५ हजार रुपैंया र हेटौंडा–६ का मिलन सापकोटाबाट एक हजार रुपैंया सहयोग भएको थियो । 
उनलाई काठमाडौं लैजान एम्बुलेन्सले लैजान नमानेपछि जिल्ला प्रहरी कार्यालय मकवानपुरका प्रहरी निरीक्षक सुजन पाठकले गाडिको समन्वय गरिदिएका थिए ।
यो पनि पढ्नुस्
मनकारी विकेस र मिलनले गरे आँखामा चोटग्रस्त बालकलाई आर्थिक सहयोग