मकवानपुरको दुई गाउँपालिकालाई नेता बानियाँले दिए ३ लाख रुपैयाँ 

२६ चैत, हेटौंडा । बागमती प्रदेश नेपाली कांग्रेस संसदीय दलका दलका नेता एवं कांग्रेस मकवानपुरका सभापति ईन्द्रबहादुर बानियाँले मकवानपुरको दुई गाउँपलिकालाई ३ लाख रुपैयाँ सहयोग गरेका छन् ।
नेता बानियाँले मकवानपुरको पश्चिमी क्षेत्रस्थित दुईवटा गाउँपालिका मनहरी र राक्सिराङलाई बुधबार कोरोनाविरुद्धको अभियानका लागि गाउँपालिकाहरुले स्थापना गरेको कोषलाई ३ लाख रुपैया सहयोग गरेका हुन् ।  
उनले मकवानपुरकै विकट राक्सीराङ गाउँपालिकालाई २ लाख र मनहरी गाउँपालिकालाई १ लाख रुपियाँ सहयोग गरेका हुन् ।
विश्वमा महामारीको रुपमा फैलिएको कोरोना भाईरसको बढ्दो संक्रमण र जोखिमलाई नियन्त्रण गर्न नेता बानियाँले गाउँपालिका पुगेर त्यहाँ निर्माण भएका आइसोलेशन वार्डको समेत निरिक्षण गरेका छन् । 
मकवानपुर क्षेत्र नम्बर २ (ख) का सांसद समेत रहेका नेता बानियाँले केहीदिन अघि विज्ञप्ती निकालेर घोषणा गरे बमोजिमको रकमको भौचर राक्सीराङ गाउँपालिका अध्यक्ष राजकुमार मल्ल र मनहरी गाउँपालिकाका अध्यक्ष एकराज उप्रेतीलाई बुधबार हस्तान्तरण गरेका हुन् ।
उक्त अवसमार नेता बानियाँले कोरोनाको बढ्दो संक्रमण र संभावित जोखिमलाई मध्यनजर गर्दै दुवै गाउँपालिकाले निर्माण गरेको आइसोलेशन वार्डको निरिक्षण गर्दै गाउँपालिकाका जनप्रतिनिधिहरु, स्वास्थ्यकर्मी, सुरक्षाकर्मीहरुलाई विशेष धन्यवादसमेत दिएका छन् ।
यसैगरी नेता बानियाँले राक्सीराङ गाउँपालिका ५ बोटबारीका ज्यालादारी र मजदुरी गरेर खाने ३० घरपरिवारलाई खाद्य सामाग्री समेत हस्तान्तरण गरेका छन् ।
लकडाउनको समयमा आर्थिक अवस्था कमजोर भएका र दुईछाक टार्न समेत समस्या परेका ३० घर परिवारलाई राक्सीराङ गाउँपालिकाले विपद व्यवस्थापन कोषबाट खाद्य सामग्री वितरण गरेको हो ।
दुवै गाउँपालिकाको आइसोलेशन वार्ड निरिक्षण तथा रकम हस्तान्तरण कार्यक्रममा कांग्रेसका महासमिति सदस्य रञ्जन कालाखेती, कांग्रेस २ ख को क्षेत्रीय सभापति लोकबहादुर मुक्तान, कांग्रेस मनहरी गाउँपालिका सभापति नारायण उप्रेती, राक्सीराङ ५ का वडा अध्यक्ष चन्द्रसिं प्रजा, राक्सीराङ गाउँपालिकाका कार्यकारी अधिकृत युवराज आचार्यगायतको उपस्थिति रहेको थियो ।