देशभर झन्डै ८ हजार मानिस क्वारेन्टाइनमा

२७ चैत्र, हेटौंडा । कोरोना भाइरसले विश्वव्यापी त्रास कायम राखेपनि नेपालमा भने आइतबार यता गरिएका कोरोना भाइरस परीक्षणमा कुनैपनि व्यक्तिमा संक्रमण भेटिएको छैन् । 
बिहीबार स्वास्थ्य मन्त्रालयले गरेको नियमित पत्रकार सममेलनमा मन्त्रालयका प्रवक्ता डा. विकास देवकोटाले आइतबार यता कुनैपनि परिक्षणमा संक्रमण नभेटिएको बताएका हुन् ।
आइतबार यता पाँच दिनमा कुल १ हजार ४ सय ५४ जनाको कोरोना भाइरस परीक्षण गरिएको मन्त्रालयले जनाएको छ । ती सबै परीक्षणमा कोरोना भाइरस (कोभिड–१९) नेगेटिभ भएको पाइएको छ । 
गत शनिबार सम्म कुल १ हजार ४ सय ४१ परीक्षण हुँदा ९ जनामा संक्रमण देखिएको थियो । जस मध्ये एक जनालाई निको भइसकेको छ । शनिबार एकैदिन ३ जनामा संक्रमण भएको विवरण सार्वजनिक गरिएको थियो । 
मन्त्रालयका प्रवक्ता देबकोटाले पत्रकार सम्मेलनमा बिहीबार सम्म कुल २ हजार ८ सय ९५ परीक्षण भइसकेको जानकारी दिए । जसमध्ये उपत्यकामा  २ हजार ३ सय ८२ र उपत्यका बाहिर ५ सय १३ परीक्षण भएको छ । 
त्यस बाहेक विहीबार थप १ सय ९३ परीक्षण भइरहेको प्रवक्ता देबकोटाले बताए । उनले बिहीबार गरिएका परीक्षण सम्पन्न भएपछि कुल परीक्षण तीन हजार नाघ्ने जानकारी दिए । 
यस्तै कैलाली र कञ्चनपुरबाट गरिएका ६६ वटा परीक्षणको कोरोना भाइरसको रिपोर्ट पनि नेगेटिभ आएको छ । प्रवक्ता देवकोटाले परीक्षणको दायरा बढाउन प्रत्येक प्रदेशमा पाँच हजारका दरले ¥यापिड टेस्ट किट पठाएको जानकारी दिए । 
यस्तै प्रवक्ता देबकोटाले अहिलेसम्म क्वारेन्टाइनमा कुल ७ हजार ९ सय ४० जना,  उपत्यकामा १८ जना र उपत्यका बाहीर ९९ जना गरी कुल १ सय १७ जना आइसोलेसनमा रहेको जानकारी दिए ।