सेटिङमा बीरगंजबाट हेटौंडा हुँदै भक्तपुर पुगेका ट्रकले स्थानीयमा त्रास

सांकेतिक तस्विर

२९ चैत, भक्तपुर । लकडाउनको समयमा हेटौंडा हुँदै भक्तपुर पुगेका ट्रकले शनिबार भक्तपुरका स्थानीयमा त्रास बढेको छ । शनिबार बिहान चाँगुनारायण नगरपालिकाको ८ र ९ वडामा कोइला बोकेका ट्रक पुगेपछि स्थानीयमा त्रास बढेको हो । 
पर्साबाट हेटौंडा हुँदै गएका एक दर्जनभन्दा बढि ट्रक चाँगुनाराण शनिबार विहान पुगेपछि स्थानीयहरुले विरोध गरेका छन् । सवारीको अगाडी खाद्यन्न र आल्मुनियम सल्फेट ढुवानीको पत्र टाँसेका ट्रक ईटा भट्टाका लागि कोइला बोकेर भक्तपुर पुगेपछि स्थानीयले चाँगुनारायण नगरप्रमुख सोमप्रसाद मिश्रसहित सुरक्षा निकायलाई खबर गरेका थिए । नगरप्रमुख मिश्र पर्साको बीरगंजदेखि भक्तपुरसम्म एक दर्जन ट्रक लाईन लागेर पुग्नमा माथिल्लो निकायको सेटिङ रहेको बताए । उनले लकडाउनमा सर्वसाधारणलाई हिडडुल समेत नगर्न भनेर दर्जन बढि ट्रक आधा दर्जन जिल्ला छिचोलेर भक्तपुर पुग्नु सेटिङ नै भएको बताए । 
अत्यावश्यक सेवामात्रै संचालनमा रहेपनि कोइला अत्यावश्यक सेवा नभएको र अहिले इट्टाभट्टा समेत करिब बन्द रहेको अवस्थामा ट्रक पठाउनु सरकारी संयन्त्रको गम्भिर लापरवाही भएको स्थानीयको भनाई छ । स्थानीयले ट्रकका चालकसहित मजदुरलाई १४ दिन क्वारेन्टाईनमा राख्न माग गरेका छन् ।