अमेरिकामा कोरोनाबाट विश्वको सबैभन्दा बढीको मृत्यु

३० चैत्र, हेटौंडा । विश्वव्यापी महामारीको रुपमा फैलिरहेको कोरोना भाइरस अर्थात कोभिड १९ को संक्रमणका कारण अमेरिकामा विश्वमा सबैभन्दा बढीको मृत्यु भएको छ ।
अमेरिकामा अहिलेसम्म कोरोनो संक्रमणबाट २० हजार ५ सय ७७ जनाको मृत्यु भएको छ । यो संख्या विश्वको सबैभन्दा बढी हो । यसअघि विश्वको सबैभन्दा बढी मानिसको मृत्यु इटालीमा भएको थियो ।
पछिल्लो २४ घण्टामा १ हजार ८ सय ३० जनाको थप मृत्यु भएसँगै अमेरिकामा विश्वको सबैभन्दा बढी मानिसको मृत्यु भएको हो । इटालीमा अहिलेसम्म १९ हजार ४ सय ६८ जनाको मृत्यु भएको छ ।
कोभिड १९ को तथ्याङक प्रस्तुत गरिरहेको वल्डोभिटर वेबसाइटका अनुसार अहिलेसम्म अमेरिकामा ५ लाख ३२ हजार ८ सय ७९ जना संक्रमित भएका छन् । पछिल्लो २४ घण्टामा मात्रै यहाँ ३० हजार ३ जना नयाँ संक्रमित थपिएका छन् । यस्तै अमेरिकामा ३० हजार ४ सय ५३ जना उपचारपछि स्वस्थ्य भएका छन् । 
अमेरिकाका पचास वटै राज्यमा कोरोना संक्रमण फैलिएकोमा न्युयोर्क राज्य सबैभन्दा बढी प्रभावित भएको छ । यहाँ अहिलेसम्म १ लाख ७२ हजार ३ सय ५८ जना संक्रमित भएका छन भने ८ हजार ७ सय ८६ जनाको मृत्यु भएको छ । यहाँ पछिललो २४ घण्टामा ७ सय ८३ जना थप मानिसको मृत्यु भएको छ । 
यसैगरी अमेरिकाको दोस्रो प्रभावित राज्यमा न्यूजर्सी रहेको छ । यहाँ २ हजार १ सय ८३ जनाले ज्यान गुमाएका छन् भने अहिलेसम्म ५८ हजार १ सय ५१ जना संक्रमित भएका छन् ।
यस्तै अमेरिकाको अन्य राज्यहरु मिचिगनमा १ हजार ३ सय ९२, लुसियानामा ८ सय ६, मासाचुसेट्समा ६ सय ८६, क्यालिफोर्नियामा ६ सय ३०, इलिनोइसमा ६ सय ७७, पेन्सिलभानियामा ५ सय १ जनाको मृत्यु भएको छ ।