बीरगंजमा ३ भारतीयलाई कोरोना, मन्त्रालयले पत्रकार सम्मेलन गर्दै

३० चैत, हेटौंडा । पर्साको बीरगंजमा रहेका ३ भारतीयमा कोरोना संक्रमणको आइतबार पुष्टि भएको छ । दिल्लीमा भएको धार्मिक सभामा सहभागी भएका उनीहरुलाई आइतबार कोरोना भएको पुष्टि भएको हो । 
मन्त्रालयको बैठकपछि यसबारे पत्रकार सम्मेलन गरेर जानकारी दिने तयारी गरिरहेको छ । शुक्रबार पर्साबाट ल्याईएका ति ३ स्वाब नमूना हेटौंडाको कोरोना परीक्षण प्रयोगशालामा पोजेटिभ (कोरोना भएको) पाईएपछि थप परीक्षणका लागि काठमाडौं टेकुस्थित राष्ट्रिय जनस्वास्थ्य प्रयोगशाला पठाईएको थियो । 
शनिबार साँझसम्म रिपोर्ट आउने भनिए पनि पोजेटिभ आएपछि मन्त्रालयबाट मात्रै आधिकारिक ढंगले सार्वजनिक गर्नुपर्ने अवस्था आएको हो । साँझ जानकारी दिने भनेका बागमती प्रदेश सामाजिक विकास मन्त्रालयका प्रतिनिधिले रिपोर्ट आउँदै छ भन्दै जवाफ दिएका थिए भने ल्याबमा खटिएका प्राविधिकहरुले मोवाईल स्विच अफ गरेका थिए । कतिपय समाचारमा हेटौंडाको नाम जोडेर समाचार आएपछि मकवानपुरका सर्वसाधारण भने त्रासमा रहेका थिए ।
उता, ३ भारतीयलाई राखिएको नारायणी उप–क्षेत्रीय अस्पतालको आइसोलेसन क्षेत्रमा कडाई गरिएको छ । अस्पतालमा हाम्रा सहकर्मी विहान १० बजे पुग्दा न्यून संख्यामा सर्वसाधारणको आवातजावत देखिएको थियो । चिकित्सकहरु समेत अन्य दिन भन्दा केही बढि सर्तकता साथ काम गरेको देखिएको छ ।

यो पनि पढ्नुस्
हेटौंडामा कसैमा कोरोना छैन : चौलागाई