कांग्रेसले जनताको भलो हुने मात्रै काम गर्छ–गृहराज्यमन्त्री बानियाँ

२८ चैत, हेटौंडा । नेपाली काँग्रेस मकवानपुरका सभापति एवं नेपाल सरकारका गृहराज्य मन्त्री ईन्द्रबहादुर बानियाँले काँग्रेसले जनताको भलो हुने काम मात्रै गर्ने बताएका छन् ।
नेपाली काँग्रेस बकैयाँ गाउँपालिका वडा नम्बर १० मन्थलीमा सोमबार कार्यकर्ता भेलामा बोल्दै बानियाँले स्थानीय निर्वाचनमा काँग्रेसलाई जिताउँदा जनताले जित्छन् र जनताको पक्षमा मात्रै काम हुने बताउँदै आउँदा स्थानीय निकायको चुनावमा काँग्रेसलाई भोट हालेर जिताउन आग्रह गरे ।
गृहराज्यमन्त्री बानियाँले ५४ वर्षपछि आफूले मकवानपुरका जनताको मत पाएर सांसद हुँदै दुईपटकसम्म राज्यमन्त्री भएर मकवानपुरको विभिन्न स्थानमा धेरै विकास निर्माणको काम गरेको बताउँदै आफूले कहीँ र कुनैपनि स्थानमा जनताले नाक खुम्च्याउनुपर्ने काम नगरेकोले काँग्रेसले गरेका विकासनिर्माण कार्यको खुलेर प्रचारप्रसार गर्न कार्यकर्ताहरुलाई आग्रह गरे ।
काँग्रेस साविक मन्थली गाविस सभापति भीमबहादुर घिमिरेको सभाध्यक्षता एवं नेपाली काँग्रेस मकवानपुरका सभापति, नेपाल सरकारका गृहराज्यमन्त्री बानियाँको प्रमूख आतिथ्यतामा भएको भेलामा एमाले, राप्रपा, माओवादीलगायत विभिन्न पार्टी परित्याग ३३ जना नेपाली काँग्रेसमा प्रवेश गरेका छन् ।
कार्यक्रममा अतिथिहरु १ नम्बर क्षेत्रीय सभापति दामोदर खनाल, जिल्ला सदस्य कृष्णप्रसाद दाहाल, महासमिति सदस्य धर्मराज लामिछाने, १ नम्बर क्षेत्रीय सचिव सुवातसिं थिङ, क्षेत्रीय नेता मिठाराम दाहाल, क्षेत्रीय सदस्यहरु सञ्जय लामा, सोम तिमल्सिना, कमला वाईबालगायतले मन्तव्य गरेका थिए ।
भेलाले भीमबहादुर घिमिरेको संयोजकत्वमा ४५ सदस्यीय चुनाव प्रचारप्रसार समिति गठनसमेत गरेको छ ।