लकडाउनमा मकवानपुरका कृषक काममा व्यस्त

हेटौंडा–६ चुच्चेखोलाका कृषक ।

२ बैशाख, हेटौंडा । सरकारले लकडाउन घोषणा गरेको दिन बढ्दै जाँदा शहरी क्षेत्रमा दिन कसरी काट्ने भन्ने चिन्ता छ । 
तर मकवानपुरका कृषकमा भने कोरोना संक्रमण र लकडाउनको चिन्ता देखिदैन । काठमाडौंसहित देशका प्रमुख शहरमा तरकारी पुर्याउने मकवानपुरको थाहा नगरपालिकाका कृषकहरु लकडाउनको पालना गर्दै कोरोना संक्रमणको जोखिमबारे सावधानी अपनाएर कृषीकर्ममा व्यस्त छन् । सरकारले भिडभाड नगर्न नभनेकाले एक दुई जना खेतमा गएर काम गरिरहेको थाहा नगरपालिका वडा नम्बर ६ बज्रबाराहीका कृषक कृष्ण बलामीलेबताए । 
‘धेरैजनाले गर्नुपर्ने काम भयो भने दुरी काम गरेर टाढा बसी काम गर्ने गरेका छौं, स्वास्थ्यको ख्याल त गर्नै पर्यो ।’–बज्रबाराहीमै काउलीमा विषादी हाल्दै गरेका नारायण महर्जनले भने । अहिले नयाँ तरकारी लगाउने, गोडमेल गर्ने, धान गोड्ने, मकै गोड्ने लगायतका कृषि कार्य सामान्य अवस्थामा झैं चलिरहेको छ । बाहिरका मानिसहरुसंगको आवातजावतलाई बन्देज गर्दै समूहमा मिलेर काम गर्ने क्रम बढ्दो छ ।
विहादेखि बेलुकासम्म खेतिमै तल्लिन हुँदा लकडाउनमा दिन गएको पत्तै नहुने हेटौंडा–६ चुच्चेखोलास्थित प्रगतिशिल महिला नमूना कृषि समूहकी कल्पना पराजुलीले बताए । ‘तरकारी किन्न आउनेहरुलाई पनि दुरी कायम गरेर दिने गरेका छौं, हामी त सधैं कृषि काममा व्यस्त छौं, लकडाउनमा के गर्ने भन्ने चिन्ता छैन ।’–समूहमै काम गरिरहेकी गायत्री घिमिरेले भनिन् ।
स्वास्थ्यकर्मी पनि कृषकहरुको खेतिकर्ममा कोरोना संक्रमण र लकडाउनले कुनै असर नगर्ने बताउँछन् । कृषि कर्मले शारिरीक व्यायाम हुने भएकाले फाइदै हुने उनीहरुको भनाई छ । कोरोना संक्रमणको जोखिम रोक्न अपनाउनुपर्ने कम्तिमा एक मिटरको दुरी कायम गरेर कृषि कार्य गर्न र मास्क लगाउन कृषकहरुलाई हेटौंडा स्वास्थ्यचौकी चौघडाका प्रमुख टिएन ढुंगेलको सुझाव छ ।
भौतिक दुरी कायम गर्दै सावधानी अपनाएर कृषि कार्यमा जुट्दा लकडाउनमा दिन काट्न सहज भएको उनीहरुको भनाई छ ।